„Ég er bara þjálfarinn þeirra og þeir eru leikmenn undir okkar stjórn“

Andri Lucas, næstelsti sonur Eiðs, var nokkuð óvænt valinn í íslenska landsliðið sem mætir Rúmeníu, Norður-Makedóníu og Þýskalandi í undankeppni HM 2022 í byrjun næsta mánaðar. Hann fylgir þar með í fótspor eldri bróður síns, Sveins Arons, sem var valinn í landsliðið fyrir leikinn gegn Liechtenstein í undankeppninni í mars.

„Það getur verið erfitt en ég styð bara við bakið á Arnari þegar hann tekur völdin. Ég hef lent í þessu áður með Svein Aron en maður verður að ná að skilgreina. Ég er bara þjálfarinn þeirra og þeir eru leikmenn undir okkar stjórn. Það hefur gengið vel,“ sagði Eiður í samtali við Henry Birgi Gunnarsson eftir blaðamannafund KSÍ í gær þar sem landsliðshópurinn var tilkynntur.

Eiður ítrekaði að verkaskiptingin milli þeirra Arnars væri skýr þegar kæmi að börnum þeirra.

„Þegar við tókum við U-21 árs landsliðinu á sínum tókum við þá ákvörðun að þegar kemur að börnum okkar þá er það hinn aðilinn sem tekur völdin,“ sagði Eiður.

Andri Lucas, sem er nítján ára, hefur verið á mála hjá Real Madrid síðan 2018 og hefur leikið með yngri liðum og varaliðum félagsins. Eiður segir að strákurinn sé tilbúinn í slaginn með A-landsliðinu. 

„Við teljum það. Hann hefur mikla burði, mikla getu og miðað við leikina sem hann hefur spilað á undirbúningstímabilinu hefur hann sýnt okkur það að hann gerir tilkall í þennan hóp,“ sagði Eiður.

Andri Lucas sleit krossband í hné í júlí 2020 en hefur náð bata og er kominn á gott skrið að sögn Eiðs.

„Hann spilaði undir lok síðasta tímabils og hefur tekið allt undirbúningstímabilið núna sem er bara fullorðinsbolti. Hann hefur spilað marga krefjandi leiki og virkar í rosalega góðu standi,“ sagði Eiður.

Ísland mætir Rúmeníu 2. september, Norður-Makedóníu 5. september og Þýskalandi 8. september. Allir leikirnir fara fram á Laugardalsvelli.

Andri Lucas hefur leikið 33 leiki fyrir yngri landslið Íslands og skorað í þeim fjórtán mörk.