Byssumaður ákærður: „Ég er að fara að stúta einum gaur skilurðu“

Það var þann 26. júní sem greint var frá ástandi sem komið hefði upp við kaffistofuna þar sem tveir karlmenn hefðu flúið undan vopnuðum manni.

Þráinn Faresveit lýsti því í samtali við Vísi hvernig hann hefði átt von á skoti í bakið þegar hann flúði byssumanninn við annan mann og kom sér fyrir inni á kaffistofunni.

„Ef maður hleypur í burtu frá manni vopnuðum skammbyssu þá á maður ekki von á öðru en að hann sé kominn til að gera eitthvað.“

Samkvæmt heimildum fréttastofu var maðurinn ógnandi með byssuna á lofti gagnvart þeim lögreglumönnum sem mættu fyrstir á vettvang. Þegar sérsveit lögreglu mætti á vettvang lagði karlmaðurinn niður vopnið og var handtekinn.

Lögregla vildi litlar sem engar upplýsingar veita um rannsókn málsins.

Saug hvítt duft upp í nefið sér

Karlmaðurinn var á dögunum úrskurðaður í áframhaldandi gæsluvarðhald í fangelsinu á Hólmsheiði. Í greinargerð lögreglu kemur fram að maðurinn hafi verið svartklæddur og virkað í annarlegu ástandi.

Lögreglumenn hafi orðið vitni að því að hann saug hvítt duft upp í nefið á sér. Sagðist hann aðspurður eftir handtöku hafa verið að taka kókaín.

Þá er því lýst þegar hann var handtekinn eftir að hafa verið með byssuna á lofti með ógnandi tilburðum. Sérsveitarmenn hafi náð honum á grjótgarði við Sæbrautina og hann hafi þá með einni snöggri hreyfingu tekið skammbyssuna upp og kastað frá sér.

Grunur leikur á að þessi aðför hafi verið liður í uppgjöri eða hefnd sem beindist sérstaklega gegn karlmanni sem var á svæðinu. Aðspurður skömmu eftir handtöku um hver ástæðan hafi verið fyrir því að hann var með byssu svaraði sakborningur: „Ég er að fara að stúta einum gaur skilurðu“.

Skothylki í hlaupi og ekkert öryggi

Í ákærunni kemur fram að skammbyssan hafi verið af tegundinni Pietro Beretta af hlaupvídd 7,65 mm. Ákæran er í fimm liðum.

Hann er í fyrsta lagi ákærður fyrir að hafa beint byssunni að karlmönnunum tveimur og þannig ógnað þeim. Í öðru lagi fyrir að beina byssunni að tveimur lögreglumönnum sem komu á vettvang. Hann gerði það í tvígang en lögreglumennirnir voru á þeim tíma í lögreglubíl. Í þriðja lagi fyrir sams konar brot gegn tveimur lögreglumönnum til viðbótar.

Þá er hann ákærður fyrir að hafa ítrekað á leið sinni frá kaffistofunni og að Sæbraut við Snorrabraut dregið upp hlöðnu hálfsjálfvirku skammbyssuna og beina í ýmsar áttir þar sem vegfarendur áttu leið hjá. Hamar byssunnar var uppdreginn, skothylki í hlaupinu og önnur sex í skotgeymi án þess að öryggi hennar væri á.

Að lokum er hann ákærður fyrir að hafa haft byssuna í sínum vörslum án skotvopnaleyfis. Auk þess var hann með fjaðrarhníf af tegundinni AKC Italy á sér.

Lögregla krefst þess að bæði vopnin verði gerð upptæk.

Líkamsárás á Sushi Social

Karlmaðurinn er grunaður um fleiri mál, þar á meðal hnífaárás á veitingastaðnum Sushi Social við Þingholtsstræti í miðbæ Reykjavíkur. Vísir birti myndband af uppákomunni sem vakti óhug og skapaði uppnám á veitingastaðnum.

Í gæsluvarðhaldsúrskurðinum kemur fram að hann sé grunaður um stórfellda líkamsárás eða hugsanlega tilraun til manndráps í því tilviki. Athygli vakti að karlmanninum var sleppt að lokinni yfirheyrslu í því máli.

Þá er hann grunaður um aðra líkamsárás í samverknaði við tvo í mars á þessu ári. Grunur leikur á að líkamsárásin hafi verið liður í svokallaðri handrukkun eða annars konar uppgjöri, eða hefnd.

Þá var hann handtekinn með kókaín á sér í apríl auk þess sem hann sætir nú þegar ákæru fyrir brot gegn umferðarlögum og lögum um ávana og fíkniefni.