Norðurkóreumenn sagðir hafa gert tilraun með sprengjuflaug

Forsætisráðherra Japana hefur þegar tjáð sig um málið og segir tilraunir Norður-Kóreu yfirgengilegar og að þær ógni öryggi íbúa svæðisins. 

Þetta er í annað sinn á einni viku sem norðanmenn gera flugskeytatilraun en í þetta sinn er óljóst hvert flaugunum var miðað eða hvar þær lentu. Fyrr í vikunni gerðu þeir tilraunir með langdræga eldflaug sem var sögð geta náð hvert sem er í Japan.

Hafi verið um sprengjuflaug að ræða í þetta sinn er um skýrt brot á ályktun Sameinuðu þjóðanna að ræða en Öryggisráðið hefur lagt blátt bann við öllum slíkum tilraunum í Norður-Kóreu.

Þarlend stjórnvöld hafa áður sagst hafa gert árangursríkar tilraunir með langdrægar sprengjuflaugar, sem þau sögðu hafa drægi til að lenda meira og minna hvar sem er í vesturhluta Evrópu og á um helming meginlands Bandaríkjanna.