Margir úrslitaleikir fram undan

Sindri Sverrisson skrifar 13. október 2021 16:01

Bruno Fernandes og Cristiano Ronaldo þurfa eru á leið í úrslitaleik gegn Serbum um efsta sæti A-riðils. Getty/Gualter Fatia

Þrjú lið hafa nú tryggt sér sæti á heimsmeistaramóti karla í fótbolta í Katar sem fram fer í nóvember og desember á næsta ári. Fram undan eru því leikir upp á líf og dauða í mörgum riðlum í undankeppninni í Evrópu.

Nú er landsleikjunum í Evrópu lokið í bili en þráðurinn verður tekinn upp að nýju 11. nóvember og undankeppninni lýkur 16. nóvember. Þá verður orðið ljóst hvaða lið vinna undanriðlana tíu í Evrópu og fara beint á HM, og hvaða tíu lið fara í umspil ásamt tveimur liðum úr Þjóðadeildinni.

Þýskaland, Danmörk og gestgjafar Katar eru einu liðin sem þegar eru örugg um sæti á HM.

Þýskaland tryggði sér sigur í J-riðli. Ísland á fjarlægan möguleika á að enda í 2. sæti en þá þurfa nær öll úrslit í síðustu tveimur umferðunum að falla með liðinu. Vegna breytinga á fyrirkomulagi Þjóðadeildarinnar mun lokastaða Íslands í þeirri keppni ekki koma liðinu í umspilið.

En hvernig er staðan í öðrum riðlum? Það er að minnsta kosti ljóst að spennan verður mikil á mörgum vígstöðvum í nóvember.

A-riðill

Serbía og Portúgal hafa tryggt sér efstu tvö sætin. Serbar eru stigi yfir en eiga aðeins einn leik eftir og það er á útivelli gegn Portúgölum, 14. nóvember. Sá leikur verður því úrslitaleikur um efsta sætið en leikur Írlands og Portúgals í Dublin þremur dögum fyrr ræður því hvort Serbíu eða Portúgal mun duga jafntefli í lokaumferðinni.

Svíar unnu mikilvægan 2-0 sigur gegn Grikklandi og eiga von um að komast beint á HM.AP/Jessica Gow

B-riðill

Spánn tekur á móti Svíþjóð í lokaumferð B-riðils og líklegt er að sá leikur verði um efsta sætið. Svíþjóð er tveimur stigum ofar en Spánn og á fyrst eftir útileik við Georgíu en Spánn sækir Grikkland heim.

C-riðill

Í C-riðli er óeiginlegur úrslitaleikur fram undan 12. nóvember þegar Ítalía tekur á móti Sviss. Með sigri svo gott sem tryggir Ítalía sér sigur í riðlinum því liðin eru bæði með 14 stig en Ítalía með tveimur mörkum betri markatölu. Sviss á svo eftir heimaleik við Búlgaríu en Ítalía útileik við Norður-Írland í lokaumferðinni, svo jafntefli gegn Sviss myndi gagnast Ítölum vel.

D-riðill

Frakklandi dugar að vinna Kasakstan á heimavelli 13. nóvember til að tryggja sér sigur í riðlinum. Baráttan um 2. sæti er hins vegar hörð á milli Úkraínu (9 stig eftir 7 leiki), Finnlands (8 stig eftir 6 leiki) og Bosníu (7 stig eftir 6 leiki). Bosnía á eftir heimaleiki við Finnland og Úkraínu, og stendur því ef til vill best að vígi. Finnland sækir Frakkland heim í lokaumferðinni.

Kylian Mbappé er á leið á HM ef að líkum lætur. Frakkar eru ríkjandi heimsmeistarar og unnu Þjóðadeildina á sunnudag.Getty/Isabella Bonotto

E-riðill

Belgía er með pálmann í höndunum á toppi E-riðils og getur klárað dæmið með heimasigri gegn Eistlandi 13. nóvember. Jafntefli væri í raun nóg fyrir Belga sem eiga svo inni útileik við Wales í lokaumferðinni. Tékkland og Wales berjast um 2. sætið, eru jöfn að stigum en Tékkland með tveimur mörkum betri markatölu. Tékkland á aðeins eftir heimaleik við Eistland en Wales á heimaleik við Hvíta-Rússland og svo við Belgíu. Markatala getur því hæglega ráðið úrslitum.

F-riðill

Danmörk hefur þegar unnið riðilinn eftir að hafa unnið alla átta leiki sína, skorað 27 mörk en ekki fengið eitt einasta mark á sig. Skotar munu líklega landa 2. sætinu en til þess dugar þeim að vinna Moldóvu á útivelli 12. nóvember, eða þá Danmörku á heimavelli í lokaumferðinni.

G-riðill

Holland (19 stig) og Noregur (17 stig) mætast í Amsterdam í lokaumferðinni 16. nóvember. Norðmenn þurfa fyrst að vinna Lettland á heimavelli til að eiga ekki á hættu að missa Holland of langt fram úr sér en Hollendingar mæta Svartfellingum 13. nóvember. Tyrkland er með 15 stig og gæti náð 2. sætinu en liðið á eftir heimaleik við Gíbraltar og útileik gegn Svartfjallalandi.

Hollendingar þurfa líklega að spila úrslitaleik við Noreg um efsta sæti G-riðils.Getty

H-riðill

Rússland og Króatía enda í tveimur efstu sætunum. Rússar eru tveimur stigum ofar en liðin mætast í Zagreb í lokaumferðinni. Fyrst eiga Rússar heimaleik gegn Kýpur en Króatar sækja Möltu heim, svo fastlega má búast við að Rússum muni duga jafntefli í Zagreb í lokaumferðinni til að tryggja sig inn á HM.

I-riðill

England (20 stig), Pólland (17 stig) og Albanía (15 stig) eiga enn von um að komast á HM. Englendingar eru í góðum málum og tryggja sig inn á HM með því að vinna Albaníu á heimavelli og San Marínó á útivelli. Pólland á eftir útileik gegn Andorra og heimaleik við Ungverjaland, og er líklegt til að enda í 2. sætinu.

J-riðill

Þýskaland vann riðilinn eins og fyrr segir en baráttan á milli Rúmeníu (13 stig), Norður-Makedóníu (12 stig) og Armeníu (12 stig) er ótrúlega jöfn. Rúmenar eru í bestum málum en þeir eiga eftir heimaleik við Ísland og útileik gegn Liechtenstein. Norður-Makedónía sækir Armeníu heim og mætir svo Íslandi. Vonin er minnst fyrir Armeníu sem sækir Þýskaland heim í lokaumferðinni.

Um veika von Íslands má lesa hér:

HM 2022 í Katar

Mest lesið

Fleiri fréttir