Mosfellingurinn í Feneyjum næstu árin

Bjarki, sem hóf knattspyrnuferilinn hjá Aftureldingu en lék einnig með ÍA hér á landi, gekk í raðir Venezia í ágúst í fyrra.

Hann lék ellefu leiki með Venezia á síðustu leiktíð, þar af tíu deildarleiki, þegar liðið vann sér sæti í efstu deild.

Bjarki bíður þess að spila sinn fyrsta leik í A-deildinni en hefur verið á varamannabekknum hjá liðinu sem er í 16. sæti. Hann hefur þó gert nóg til að sannfæra forráðamenn Venezia um að bjóða sér nýjan samning til tæplega þriggja ára.

„Ég er afar ánægður með að hafa endurnýjað samninginn minn, sérstaklega við félag sem er með framúrskarandi framtíðarsýn sem ég hef mikla trú á. Ég hef hér frábært tækifæri til að þroskast í umhverfi þar sem hlúð er fullkomlega að þróun ungra leikmanna. Þetta félag er eins og fjölskylda. Ég er viss um að í náinni framtíð mun ég sanna virði mitt fyrir þetta lið,“ sagði Bjarki á heimasíðu Venezia.

Mikið Íslendingafélag

Venezia hefur á skömmum tíma orðið mikið Íslendingalið. Hjá félaginu er einnig Arnór Sigurðsson, að láni frá CSKA Moskvu, og Óttar Magnús Karlsson er á mála hjá félaginu en var lánaður til C-deildarliðs Siena.

Á þessu ári hafa þrír ungir Íslendingar farið til Venezia til að spila þar með U19-liði félagsins. Jakob Franz Pálsson kom frá Þór í febrúar, fyrst að láni en var svo keyptur í sumar. Hilmir Rafn Mikaelsson var fenginn frá Fjölni í sumar og Kristófer Jónsson, fyrrverandi leikmaður Hauka, að láni frá Val fram á næsta sumar.

Þá var hinn 17 ára gamli Ingi Þór Sigurðsson úr ÍA, bróðir Arnórs, fenginn til æfinga hjá Venezia fyrr í þessum mánuði.