Fyrsta rafmagnsflugvélin í sögu íslensks flugs komin til landsins

Í fréttum Stöðvar 2 mátti sjá sérsmíðaðan vagn hífðan í land í Sundahöfn í Reykjavík en leiguskip Eimskips kom með farminn frá Rotterdam í morgun. Í vagninum er lítil flugvél, Pipistrel Velis Electro, sem kemur ný frá verksmiðjunum í Slóveníu.

Fyrir verkefninu standa þeir Matthías Sveinbjörnsson, forseti Flugmálafélags Íslands, og Friðrik Pálsson, fyrrverandi forseti félagsins, en þeir eru að safna í lið öflugra aðila til að hefja rafvæðingu flugsins hérlendis.

„Já, það eru miklar væntingar. Þetta er eitt skref af mörgum í tengslum við það að fara í orkuskiptin í flugi,“ segir Matthías.

„Við Matthías eru búnir að vera að glíma við þetta mál á þriðja ár. Og nú tekur við að koma saman hópi sem sýnir þessu áhuga að hjálpa okkur með þetta. Og við munum kynna þetta svo formlega eftir áramótin,“ segir Friðrik.

Pipistrel Velis er fyrsta rafmagnsflugvél heims til að hljóta vottun Flugöryggisstofnunar Evrópu, EASA, til almannaflugs og um leið sú fyrsta til að hljóta slíkt alþjóðlegt flughæfisskírteini. Þeir félagarnir búast þó vart við að hún sjáist á flugi hérlendis fyrr en með vorinu.

„Það er heilmikið sem er eftir núna í tengslum við að fá vélina skráða, kenna mönnum að fljúga henni og flugvirkjum að skrúfa í henni og fleira. Þetta er ný tækni. Þetta er eitthvað sem við höfum aldrei gert áður. Þannig að það tekur sinn tíma,“ segir Matthías.

Þeir segja spennandi tíma framundan í orkuskiptum flugsins.

„Það er allt sem bendir til þess að þetta sé að gerast hraðar heldur en menn áttu von á að myndi gerast. Það eru fjölmargar vélar í smíðum og í reynsluflugi,“ segir Friðrik.

Og þegar spurt er hvenær íslenskur almenningur geti vænst þess að fljúga á rafmagni er bent á hina sænsku E-19 Heart Aerospace, nítján sæta vél sem á að vera komin í notkun um mitt ár 2026, innan fimm ára. Matthías segir þó að hin tveggja sæta Pipistrel Velis sé fyrsta vélin á Íslandi.

„Það verður hægt að kenna á þessa vél, - einn farþegi getur farið með henni, - þannig að menn geta strax farið að fljúga þessari vél bara á vormánuðum,“ segir Matthías og bætir við:

„Síðan í innanlandsflugi og jafnvel millilandaflugi, það er styttra í það heldur en menn halda.“

Hér má sjá frétt Stöðvar 2: