Jón Daði og félagar nálgast umspilssæti

Jón Daði er búinn að vinna sér inn sæti í byrjunarliði Bolton eftir að hann gekk til liðsins í síðasta mánuði og hann byrjaði í fremstu víglínu í kvöld.

Ekkert var skorað í fyrri hálfleik, en George Johnston kom Bolton yfir á 53. mínútu áður en Cohen Bramall jafnaði metin tæpum stundarfjórðungi síðar.

Það voru svo varamennirnir Kieran Sadlier og Amadou Bakayoko sem tryggðu Bolton 3-1 sigur þegar þeir skoruðu sitthvort markið með stuttu millibili undir lok leiksins.

Jón Daði og félagar hans í Bolton sitja nú í tíunda sæti C-deildarinnar með 51 stig eftir 34 leiki, fjórum stigum á eftir Sunderland sem situr í sjötta og seinasta umspilssætinu um laust sæti í B-deildinni. Lincoln situr hins vegar í 17. sæti með 35 stig.