Íslenski boltinn

„Fjölmennasti starfsmannahópurinn“ kallar eftir skýrri sýn Vöndu og Sævars

Sindri Sverrisson skrifar
Dómarar vilja vita hver stefna frambjóðenda er í dómaramálum.
Dómarar vilja vita hver stefna frambjóðenda er í dómaramálum. vísir/bára

Knattspyrnudómarar kalla eftir skýrri framtíðarsýn um dómaramál innan KSÍ hjá frambjóðendum til formanns og stjórnar KSÍ, fyrir ársþing sambandsins sem fram fer um helgina.

Félag deildardómara hefur sent frá sér ályktun í aðdraganda ársþingsins og gagnrýna að Vanda Sigurgeirsdóttir og Sævar Pétursson, sem ein berjast um formannssætið á þinginu, skuli ekki hafa skýrt betur sína sýn á störf „fjölmennasta starfsmannahóps KSÍ“

Í ályktuninni er bent á að störf dómara séu sífellt meira gagnrýnd á opinberum vettvangi, og þar segir að forystumenn og sumir frambjóðendur til stjórnar og formennsku KSÍ hafi ekki dregið af sér í þessari gagnrýni í gegnum tíðina.

Ályktun stjórnar FDD:

Stjórn Félags deildardómara (FDD) fagnar þeirri miklu umræðu sem skapast hefur um stöðu og framtíð íslenskrar knattspyrnu í aðdraganda ársþings KSÍ. Mikilvægt er að fram fari opin og frjó umræða um allar hliðar íslenskrar knattspyrnu.

Það er þess vegna sem stjórn FDD saknar umræðu um dómaramál, einn af undirstöðumálaflokkum leiksins. Hvorki frambjóðendur til formanns né aðrir frambjóðendur til stjórnar hafa sýnt á spilin hvert skuli stefna í þessum málaflokki.

Dómarar eru fjölmennasti starfsmannahópurinn innan KSÍ og óumdeilt að án dómara er engin leikur. Þessi þögn er undarleg, sér í lagi ef horft er til þess að störf dómara eru meira og meira gagnrýnd á opinberum vettvangi. Forystumenn og sumir frambjóðendur til stjórnar og formennsku KSÍ hafa ekki dregið af sér í þessari gagnrýni gegnum tíðina.

Því hvetur stjórn FDD frambjóðendur til formanns og stjórnar KSÍ að koma fram með sína sýn á framtíð dómgæslu og dómaramála innan KSÍ, knattspyrnunni til heilla.

Stjórn Félags deildardómara

Bryngeir Valdimarsson

Gunnar Helgason

Egill Arnar Sigurþórsson

KSÍ Íslenski boltinn

Mest lesið


Fleiri fréttir

Sjá meira


×

Mest lesið