Atli og Kristófer Ingi fastir við botninn í Dan­mörku

Danska úrvalsdeildin er farin af stað á nýjan leik eftir vetrarfrí og það var margt um manninn í Bröndby er botnlið SönderjyskE kom í heimsókn. Atli Barkarson var í vinstri vængbakverði í 3-4-3 uppstillingu gestanna á meðan Kristófer Ingi lék sem fremsti maður.

Heimamenn voru töluvert sterkari aðilinn og kom hinn ungi Henrik Heggheim þeim yfir um miðbik fyrri hálfleiks. Skömmu síðar fékk Nicolaj Thomsen gult spjald í liði gestanna sem átti eftir að reynast dýrkeypt þar sem hann nældi sér í annað slíkt á 38. mínútu og gestirnir þurftu því að spila manni færri í rúmlega 52 mínútur.

Staðan var þó enn 1-0 í hálfleik og þrátt fyrir að vera manni færri komu gestirnir boltanum í netið þegar tíu mínútur voru liðnar af síðari hálfleik. Markið var hins vegar dæmt af eftir að myndbandsdómari leiksins fór yfir það.

Atli var tekinn af velli á 79. mínútu er SönderjyskE gerði breytingar í von um að jafna leikinn. Það gekk ekki eftir og Bröndby vann mikilvægan 1-0 sigur.

Heimamenn eru því með 36 stig í 2. sæti, líkt og Midtjylland en bæði lið eru þremur stigum á eftir toppliði FC Kaupmannahöfn. SönderjyskE situr hins vegar á botni deildarinnar með aðeins 10 stig að loknum 19 umferðum.