Hörð barátta um meirihlutann í Eyjum

Þrír listar bjóða fram til næstu sveitarstjórnarkosninga í Vestmannaeyjum eða H-listi, Fyrir Heimaey, D-listi Sjálfstæðisflokks og E-listi fyrir Eyjalistann.

Í Vestmannaeyjum búa nú tæplega fjögur þúsund og fimm hundruð manns en á kjörskrá eru um 3.100 manns.

Síðustu fjögur ár hafa H-listi og Eyjalistinn verið í meirihluta í bæjarstjórn í sjö manna bæjarstjórn þar sem H-listi hefur verið með þrjá og Eyjalistinn með einn mann. Sjálfstæðismenn hafa verið með þrjá  í minnihluta. Nú á að fjölga bæjarfulltrúum í níu. 

Bæjarstjóri er Íris Róbertsdóttir en hún stofnaði H-listann fyrir síðustu sveitarstjórnarkosningar eftir klofning frá Sjálfstæðisflokknum. Klofningurinn var sagður að mestu leyti vegna óánægju með að ekki var haldið prófkjör í Sjálfstæðisflokknum þá heldur stillt upp á lista en það reyndar verið þannig í 28 ár. Að þessu sinni er Sjálfstæðisflokkurinn hins vegar sá eini sem hélt prófkjör.  Sjálfstæðisflokkurinn hafði fyrir 2018 verið með hreinan meirihluta í bæjarstjórn Vestmannaeyja síðan árið 2006

Áherslurnar 

Fréttastofa innti frambjóðendur listanna eftir helstu áherslum.

„Við viljum bara fjárfesta í framtíðinni, það er að fjárfesta í ungu fólki og innviðunum hér til að allir líti á Vestmannaeyjar sem besta kost þegar þeir velja sér búsetukost,“ segir Íris Róbertsdóttir bæjarstjóri Vestmannaeyja sem situr  í 2. sæti H-lista.

Eyþór Harðarson útgerðarstjóri hjá Ísfélagi Vestmannaeyja er oddviti Sjálfstæðisflokksins í Eyjum en hann hafði betur gegn Hildi Sólveigu Sigurðardóttur sem var oddviti flokksins í bæjarstjórn.

„Við erum að koma úr frábæru prófkjöri þar sem tæplega þúsund manns tóku þátt og það hefur svona gefið okkur vind í seglinn. Ég held að það brenni heitast á bæjarbúum að þeir vilja  ábyrga stjórn, stöðugleika og framsýni,“ segir Eyþór. 

Erlingur Guðbjörnsson stöðvarstjóri Íslandspósts og í þriðja sæti á Eyjalistanum er ánægður með samstarfið við H-listann síðustu fjögur ár. 

„Það sem brennur mest á Vestmannaeyingum eru samgöngumál, heilbrigðismál og menntamál en menntamálin hafa verið í brennidepli hjá okkur,“ segir hann. 

Greinilegt er að Sjálfstæðismenn vonuðust eftir að einhverjir kæmu til baka frá H-lista í prófkjörinu nú. 

Fréttastofa innti Írisi Róbertsdóttur sem var áður í Sjálfstæðisflokknum um hvort henni hafi verið boðið að taka þátt í prófkjöri flokksins.

Aðspurð um hvort það hafi gróið um heilt milli Sjálfstæðisflokks og H-lista segir Íris:

„ Það er bara fólk í báðum framboðunum og það er misjafnt hvort svo sé,“ segir hún. 

Misjafnt hvaðan bæjarstjóraefnin koma

Framboðin hafa mismunandi áherslur varðandi bæjarstjóraefni.  Þannig ætlar Íris að halda áfram sem bæjarstjóri sigri H-listinn. 

„Ég er bæjarstjóraefni H-listans áfram. Við göngum óbundin til kosninga. Ég held að allir sem vilja halda áfram að byggja upp og veita góða þjónustu séu góðir samstarfsflokkar,“ segir hún. 

Sjálfstæðisflokkurinn ætlar hins vegar að að ráða bæjarstjóra. 

„Ef það fer svo vel að við vinnum meirihlutann þá er fyrsta verkið okkar að leita okkur að góðum bæjarstjóra,“ segir Eyþór. 

Bæjarstjóraefni E-lista er oddviti flokksins, Njáll Ragnarsson formaður bæjarráðs Vestmanneyja. 

Samgöngu-og íþróttamál brenna heitast á bæjarbúum

Fréttastofa spurði fólk á förnum vegi í Vestmanneyjum hvað því þætti skipta mestu máli í bæjarpólitíkinni og greinilegt er að samgöngumálin brenna hvað heitast á fólki. 

„Samgöngumálin, númer eitt tvö og þrjú og hundrað,“ sagði Þórleif Guðmundsdóttir. 

Sonja Andrésdóttir íbúi svaraði því sama en hún vill líka betri samgöngumáta fyrir dýr í eyjum. 

„Það eru samgöngumálin númer eitt tvö og þrjú hérna í eyjum. Við erum líka nýbúin að stofna dýrasamtök hér og berjumst t.d. fyrir því að dýrin okkar fái betra pláss í Herjólfi en eins og er þá þurfa þau að hírast inn í bílunum meðan siglt er milli lands og eyja,“ segir hún. 

Íþróttamálin eru ofarlega í huga margra bæjarbúa og þá er deilt um hvort það eigi að setja gervigras á knattspyrnuvöllinni eða ekki.

„Mér sýnist menn ætla að stilla upp einhverju íþróttahúsi hérna og gervigrasi sem einverju pólitísku máli ég skil það ekki alveg,“ segir Sigurjón Ingvarsson sem segir löngu kominn tíma til að gera endurbætur á íþróttamannvirkjum. 

Örn Hilmisson var á sama máli. 

„Mér finnst skipta mestu að við sýnum öfluga samstöðu til framtíðar í íþróttamálunum. En svo eru það göng milli lands og eyja sem maður bíður þokkalega rólegur eftir,“ segir hann brosandi að lokum.