Margrét Lára: Ég er svo þreytt á því að horfa á þetta í íslenskum kvennafótbolta

Kveikjan var annað mark Valsliðsins í sigrinum á Keflavík en það skoraði Ída Marín Hermannsdóttir eftir sniðuga fyrirgjöf frá Þórdísi Hrönn Sigfúsdóttur.

„Sjáum Þórdísi hér senda boltann fyrir og mér finnst þetta alltaf svo skemmtileg mörk,“ sagði Helena Ólafsdóttir um leið og hún sýndi markið hjá Ídu.

„Ég er svo sammála þér Helena. Ég er svo þreytt á því að horfa á íslenskan kvennafótbolta og þessar fyrirgjafir sem eru að koma alltaf snemma inn í teiginn. Það er auðvelt fyrir varnarmenn að skalla frá og markmennirnir eins og Sonný Lára, elska þessa bolta,“ sagði Margrét Lára Viðarsdóttir.

„Ég vil að leikmennirnir komist upp að endamörkum og komi með boltann út í teiginn,“ sagði Margrét.

„Þá er eiginlega ekki hægt að klúðra því,“ sagði Helena.

Þær sýndu síðan þriðja markið þar sem Ásdís Karen Halldórsdóttir komst upp að endamörkum og kom boltanum út í teiginn á Elínu Mettu Jensen sem skoraði.

„Sjáið. Komst upp að endamörkum og sendi boltann út í teiginn. Það er svo erfitt að verjast þessu. Markvörðurinn er stimplaður út og miðverðirnir báðir eru yfirleitt stimplaðir út,“ sagði Margrét Lára.

„Hlustið nú, hlustiði á Margréti,“ sagði Sonný Lára Þráinsdóttir, sérfræðingur í Bestu mörkunum.

Það má sjá þessa umfjöllun hér fyrir ofan sem og umfjöllunina um sigur Valsliðsins á toppliði Keflavíkur.