Nýtt lyf heftir vöxt krabba­meins­æxla

Lyfið, trastuzumab deruxtecan, selt undir nafninu Enhertu, er sagt hefta vöxt á krabbameinsæxlum. Í meðferðarprófun sem framkvæmd var á 557 sjúklingum með meinvörp í brjóstum var tveimur þriðju hlutum sjúklinga gefið trastuzumab deruxtecan og einum þriðja hluta gert að gangast undir hefðbundna lyfjameðferð. Niðurstöður prófunarinnar leiddu í ljós að í þeim sjúklingum sem fengu trastuzumab deruxtecan stöðvaðist vöxtur æxla í tíu mánuði á móti þeim fimm mánuðum sem hefðbundin lyfjameðferð gaf af sér.

Umrætt lyf einblínir á HER2 prótein sem fyrirfinnst í fimmtán til tuttugu prósent brjóstakrabbameinssjúklinga en lyfið byggir á mótefni sem leitar uppi próteinið á yfirborði krabbameinsfrumna og drepur þær.

Dr. Halle Moore, yfirmaður brjóstakrabbameinslækninga hjá Cleveland Clinic segir meðferðarprófanir vanalega geta gefið sjúklingum nokkrar vikur til viðbótar, en það sé þó ekki sjálfsagt. Það er því sjaldséð að lyf auki lífslíkur með þessum hætti.