Banaslys í Reynisfjöru

Þetta kemur fram í tilkynningu frá Lögreglunni á Suðurlandi. 

Þyrla Landhelgisgæslunnar var kölluð út um fimmleytið í gærþar sem erlendur ferðamaður hafði lent í sjónum við Reynisfjöru. Þyrlan kom á vettvang tæpri klukkustund síðar og náði manninum úr sjónum. 

Í tilkynningu lögreglu segir að snarræðri nærstaddra hafi komið í veg fyrir að aldan hafi einnig hrifið eiginkonu mannsins sem lést með sér.

„Eiginkona mannsins lenti í sömu öldu en tókst, fyrir snarræði nærstaddra, sem komu til aðstoðar, að bjarga sér áður en hún sogaðist út í brimið.“

Björgunarsveitir af Suðurlandi og úr Vestmanneyjum voru kallaðar til aðstoðar ásamt þyrlusveit LHG. 

Aðstæður til aðgerða úr landi voru erfiðar og hættulegar viðbragðsaðilum vegna mikils brims. Maðurinn var hífður upp í þyrluna strax og hún kom á staðinn en reyndist þá látinn.

Hjónin voru í stærri hóp í skipulagðri ferð á vegum ferðaskrifstofu.

Unnið er að rannsókn slyssins.

Alls hafa tólf alvarleg útköll borist vegna Reynisfjöru síðustu sjö árin, þar af hafa fimm látist. Ung kínversk kona lést í Reynisfjöru í nóvember þegar alda hreif hana með sér út í sjóinn.