Rashford segist tilbúinn í ferskt start undir Ten Hag

Rashford skoraði ekki nema fimm mörk á síðasta tímabili og voru farnir að heyrast orðrómar um að það ætti jafnvel að selja hann í sumar. Rashford hefur snúið aftur til æfinga og er sagður vera tilbúinn að berjast fyrir sæti sínu í liðinu. Rashford talaði um það hvernig nýr þjálfari kemur með nýjar áherslur og þannig ferskan blæ inn á æfingasvæðið.

„Það er aftur orðið spennandi að koma á æfingu og mönnum hlakkar til að koma sem er mjög jákvætt. Nú snýst þetta, í fyrsta lagi, um að meðtaka hvernig Erik {Ten Hag] vill spila og smáatriðin sem hann vill leggja áherslu á og í öðru lagi þurfum við að njóta þess að æfa og spila.“

„Í fyrstu æfingavikunni höfum við verið að gera bæði og öllum hlakkar til að fara í æfingarferðalagið til að sýna hvað við höfum lært á æfingasvæðinu í leikjunum. Þetta er nýtt upphaf fyrir alla og fyrir mig persónulega hef ég átt langt hlé og fínar æfingar til að koma inn á undirbúningstímabilið á réttu nótunum. Eins og ég sagði þá hefur okkur hlakkað til að byrja og þurfum að sýna hvað við höfum lært á æfingum og hvað við munum læra í framtíðinni og ekki bara á undirbúningstímabilinu heldur á keppnistímabilinu líka.“

Manchester United er á leiðinni til Asíu og mun keppa við Liverpool í Bangkok þann 12. júlí næstkomandi.