„Ótrúlega mikilvægt að vera með akkúrat þessa týpu í liðinu sínu“

„Þegar þú horfir á leiki með Val núna, þá heyrir þú hvert einasta orð sem hún segir á vellinum, hún stjórnaði til dæmis þessari pressu í fyrri hálfleik, rak þær fram í að stíga upp á réttum tímapunktum og loka rétt. Þetta er svo mikilvægt og maður sér þetta ekki alltaf svona áþreifanlega, hennar hlutverk í þessu liði en það er gríðarlega mikilvægt. Hún er bara annar þjálfari þarna og ég var mjög ánægð með hana í þessum leik,“ segir Margrét Lára um Ásgerði, fyrrum liðsfélaga sinn hjá Val.

Þáttastjórnandinn Helena Ólafsdóttir sagði þá fólk ekki endilega gera sér alltaf grein fyrir mikilægi Ásgerðar og kvaðst hún finna mikinn mun á að lýsa leik með henni úr stúdíói og svo að sjá hana á vellinum, úr stúkunni, því þá heyrði hún virkilega í henni, að reka leikmenn áfram meðan leikurinn færi fram.

„Hún er náttúrulega bara fyrirliði í sér og hefur alltaf verið,“ segir Harpa Þorsteinsdóttir, sem lék með Ásgerði hjá Stjörnunni.

„Það er ekki að ástæðulausu sem hún hefur unnið jafn marga titla og raun ber vitni. Hún er bara algjör sigurvegari og skilur leikinn ótrúlega vel. Það eru bara forréttindi að hafa spilað með henni og þeir sem hafa gert það vita bara hvað það er ótrúlega mikilvægt að vera með akkúrat þessa týpu í liðinu sínu,“

Umræðuna má sjá í heild sinni að ofan.