Íranar reyndu að stela dróna Banda­ríkja­hers

Dróninn sem um ræðir er ómannaður sjávardróni sem var á siglingu við Arabíuflóa. Sjóher Bandaríkjanna var á ferð nálægt drónanum og tók eftir því þegar eitt herskipa Írans, Shahid Baziar, var að draga drónann.

Áhöfn bandaríska herskipsins USS Thunderbolt hafði samband við áhöfn Shahid Baziar og tilkynnti að þeir vildu fá drónann til baka. Íranar losuðu tak sitt á drónanum ekki strax og því var Sea Hawk-þyrla hersins sem var staðsett í Barein send á staðinn. Þá slepptu Íranar drónanum.

Samband Íran og Bandaríkjanna er ekki á besta stað þessa stundina en viðræður um kjarnorkusáttmála þeirra eru á afar viðkvæmu stigi að sögn CNN.

„Þetta var gróft, ástæðulaust og ekki í samræmi við hegðun sem atvinnusiglingarsveit á að sýna af sér,“ segir í yfirlýsingu frá Bandaríkjaher vegna málsins.