Vanda listar upp aðgerðir KSÍ gegn kynferðisofbeldi

Vanda fjallar um þetta í pistli sem hún skrifar á vef KSÍ nú tæpu ári eftir að hún var kjörin formaður. 

Í pistlinum nefnir hún nokkur verkefni sem eru henni sérstaklega hugleikin og þar á meðal er stofnun sérstaks ungmennaráðs, til að fá meiri aðkomu barna og unglinga að ákvarðanatöku í knattspyrnuhreyfingunni, sem og að opna betur samtalið við opinbera aðila til að benda á hvernig styðja megi betur við knattspyrnustarfið í landinu.

Stærstur hluti pistilsins fer þó í yfirlit yfir þau verkefni sem KSÍ hefur unnið eða vinnur að varðandi forvarnir og fræðslu um kynferðislega áreitni, ofbeldi og jafnréttismál.

Á það var bent í grein á Vísi í lok ágúst að á því ári sem liðið væri frá því að Guðni Bergsson sagði af sér sem formaður KSÍ, í skugga skandals sem skók sambandið, virtist lítið hafa verið gert í þessum málum.

Í raun væri eina stóra breytingin sú að stjórn KSÍ hefði samþykkt viðbragðsáætlun þann 25. maí þar sem sagði að leikmenn þjálfarar og aðrir sem störfuðu innan KSÍ þyrftu að stíga til hliðar væru mál þeirra til meðferðar hjá rannsóknar- eða ákæruvaldi og/eða samskiptaráðgjafa ÍSÍ.

Vanda segir hins vegar að flest þau atriði sem nefnd hafi verið í skýrslum nefnda og starfshópa sem skipuð voru vegna þessara mála hafi þegar verið virkjuð. 

Þeirri vinnu er aftur á móti í mörgum tilvikum ekki lokið, eins og til að mynda uppfærslu siðareglna KSÍ með sérgrein varðandi ofbeldi, og útfærslu samninga við leikmenn og starfsfólk landsliða sem tækju mið af þeim siðareglum.

 Vanda telur upp eftirfarandi atriði í þessu samhengi:

• Stjórn KSÍ samþykkti í vor meginviðmið varðandi það hvenær fulltrúar KSÍ skuli stíga til hliðar í hlutverki sínu og eiga þær reglur jafnt við um dómara, þjálfara, leikmenn, forystumenn, starfsmenn og aðra þá sem eru innan KSÍ.
• Forvarnar- og viðbragðsáætlun er í uppsetningu hjá Samskiptaráðgjafa íþrótta- og æskulýðsstarfs og á að vera tilbúin í september.
• Uppfærsla siðareglna KSÍ er í vinnslu.
• Samningar við leikmenn og starfsfólk landsliða eru í vinnslu og áætlað er að þeirri vinnu ljúki á haustdögum.
• Á vef KSÍ er hlekkur inn á vefsíðu Samskiptaráðgjafa íþrótta- og æskulýðsmála (og annað fræðsluefni), þar sem er m.a. að finna upplýsingar og úrræði fyrir þolendur.
• Námsefni um jafnrétti, forvarnir og fræðsla um ofbeldi og sér í lagi kynferðisofbeldi er hluti af þjálfaramenntun KSÍ. Þar á meðal taka þjálfarar sérstakt netnámskeið æskulýðsvettvangsins.
• KSÍ tilkynnti fyrr á árinu um tveggja ára samstarfsverkefni með Barnaheillum. Um er að ræða fræðsluverkefnið Verndarar barna með það að markmiði að fyrirbyggja kynferðislegt ofbeldi gegn börnum, þekkja einkenni ofbeldis og læra að bregðast við. Öllum aðildarfélögum KSÍ stendur til boða fræðsla fyrir sitt starfsfólk.
• Vinna við fræðslu til leikmanna landsliða er langt komin og mun sú fræðsla, sem verður tilbúin haustið 2022, einnig standa aðildarfélögum KSÍ til boða.
• Allir stjórnarmenn og nefndarmenn innan KSÍ hafa undirritað undir yfirlýsingu um trúnað, hlutleysi og virðingu.
• Aðildarfélög KSÍ hafa brugðist vel við ákalli um að huga að jafnrétti kynjanna við val á sínum þingfulltrúum síðustu ársþing KSÍ og á þinginu 2022 voru fleiri konur þingfulltrúar en nokkru sinni fyrr.
• Í kosningum og við skipan í nefndir á ársþingi 2022 var hugað sérstaklega að jafnrétti kynjanna og er staðan þannig að í nefndum og starfshópum á vegum KSÍ í dag eru karlar 53% og konur 47%, sem er vel yfir þeim markmiðum sem við settum okkur og líklega einsdæmi í knattspyrnuheiminum.

Vanda lýkur pistlinum á að nefna þá spennandi tíma sem eru hjá íslensku landsliðunum en bæði A-landslið kvenna og U21-landslið karla eiga möguleika á því að komast inn á stórmót í haust, og A-landslið karla á enn von um að vinna sinn riðil í Þjóðadeildinni.

Þá segir hún spennandi að fylgjast með lokum mótanna hér heima og nefnir sérstaklega nýja fyrirkomulagið í Bestu deild karla, þar sem úrslitakeppni tekur brátt við eftir lokaumferð hefðbundnu deildakeppninnar á laugardaginn.