Flutti kókaín í fjór­tán pakkningum inn­vortis til landsins

Í ákæru kemur fram að maðurinn hafi komið til landsins með flugi Lufthansa frá München í Þýskalandi þann 14. ágúst síðastliðinn. Hann hafi verið stöðvaður af tollvörðum á Keflavíkurflugvelli og fannst kókaínið í fjórtán pakkningum sem hann hafði falið innvortis.

Maðurinn játaði sök í málinu, en í dómi segir að maðurinn hafi ekki áður orðið uppvís að refsiverðri háttsemi svo vitað sé.

„Af fyrirliggjandi gögnum verður ekki ráðið að hann hafi verið eigandi nefndra fíkniefna eða tekið þátt í skipulagningu á kaupum og innflutningi þeirra til Íslands með öðrum hætti en þeim að samþykkja að flytja efnin til landsins gegn greiðslu,“ segir í dómnum.

Dómari taldi fimm mánaða fangelsi vera hæfilega refsingu, en til frádráttar kemur gæsluvarðhald sem hann sætti frá 14. ágúst síðastliðinn.

Manninum var jafnframt gert að greiða sakarkostnað, alls um 1,6 milljónir króna.