Aron og félagar styrktu stöðu sína á toppnum

Aron og félagar höfðu yfirhöndina í fyrri hálfleik og náðu mest þriggja marka forskoti um miðjan hálfleikinn. Þeirri forystu héldu þeir fram að hléinu, en staðan var 14-17 þegar liðin gegnu til búningsherbergja.

Gestirnir frá Álaborg náðu fljótt sex marka forskoti í upphafi síðari hálfleiks, en heimamenn gáfust ekki upp og minnkuðu muninn jafnt og þétt. Heimamenn náðu að minnka muninn niður í eitt mark um miðjan síðari hálfleik, en nær komust þeir ekki og niðurstaðan varð þriggja marka sigur Álaborgar, 33-36.

Aron skoraði eitt mark fyrir Álaborg í dag, en liðið trónir enn á toppi deildarinnar með 15 stig eftir átta leiki, þremur stigum meira en Kolding og GOG sem sitja í öðru og þriðja sæti, en GOG á leik til góða.