Fé­lags­legar á­herslur Norður­landa verða að fylgja lofts­lags­að­gerðum

Á sameiginlegum fréttamannafundi með forsætisráðherrum hinna Norðurlandanna sagði Katrín að mikilvægt væri að halda á lofti félagslegum áherslum Norðurlandanna í aðgerðum gegn loftslagsbreytingum.

Hún tekur við forystu í ráðherraráði Norðurlandaráðs á þinginu og sagði Norðurlöndin eins og önnur ríki verða að gera meira til að vinna gegn loftslagsbreytingunum.

„Það er mjög mikilvægt, jafnvel þótt það séu erfiðir tímar í landfræðipólitísku ástandi í heiminum, að við gerum allt sem í okkar valdi stendur til að hraða grænum umskiptum, að orkukreppan verði ekki til þess að seinka nauðsynlegum aðgerðum,“ sagði Katrín Jakobsdóttir.