Ekkert fær Kefla­­vík stöðvað og Fjölnir vann dramatískan sigur

Eins ótrúlegt og það hljómar var leikur Keflavíkur og Breiðabliks nokkuð spennandi í fyrsta leikhluta en að honum loknum munaði aðeins einu stigi á liðinu. Eftir það settu Keflvíkingar í fluggírinn á meðan Blikar festust í kviksyndi.

Munurinn á liðunum í hálfleik var kominn upp í 11 stig og jókst svo enn meira í síðari hálfleik. Á endanum fór það svo að Keflavík vann 35 stiga sigur og þar með sinn níunda leik í röð í deildinni.

Anna Lára Vignisdóttir var stigahæst í liði Keflavíkur með 17 stig. Sanja Orozvic var stigahæt í liði Blika með 15 stig en hún tók einnig 14 fráköst.

Fjölnir tók á móti ÍR og stefndi í öruggan sigur heimaliðsins þegar þremur leikhlutum var lokið. Fjölnir leiddi þá með 14 stiga mun og virtist ætla að vinna einkar þægilegan sigur.

ÍR-ingar komu hins vegar til baka og var staðan óvænt orðin jöfn þegar aðeins örfáar sekúndur voru til leiksloka. Fjölnir náði á endanum að setja körfuna sem skildi liðin að og vann tveggja stiga sigur, 83-81.

Taylor Dominique Jones var stigahæst hjá Fjölni með 36 stig. Urté Slavickaite kom þar á eftir með 26 stig. Hjá ÍR var Greeta Uprus með 21 stig og Rebekka Rut Hjálmarsdóttir með 19 stig.

Keflavík er á toppi deildarinnar með níu sigra í níu leikjum. Á sama tíma er ÍR á botninum án stiga. Grindavík er í 5. sæti með þrjá sigra og sex töp líkt og Fjölnir sem er sæti neðar.