Handbolti

Hefur ekki áhyggjur af Aroni hjá FH: „Mun bara halda sér í toppstandi eins og alltaf“

Hjörtur Leó Guðjónsson skrifar
Guðmundur Guðmundsson hefur ekki áhyggjur af því að ákvörðun Arons Pálmarssonar muni koma niður á þeim gæðum sem leikmaðurinn hefur upp á að bjóða.
Guðmundur Guðmundsson hefur ekki áhyggjur af því að ákvörðun Arons Pálmarssonar muni koma niður á þeim gæðum sem leikmaðurinn hefur upp á að bjóða. Sanjin Strukic/Pixsell/MB Media/Getty Images

Guðmundur Þórður Guðmundsson, landsliðsþjálfari karlalandsliðs Íslands í handbolta, hefur ekki áhyggjur af því að ákvörðun Arons Pálmarssonar um að snúa aftur til FH úr atvinnumennsku muni hafa áhrif á gæðin sem leikmaðurinn hefur upp á að bjóða.

Aron var kynntur til leiks hjá FH í gærkvöldi við hátíðlega athöfn í Kaplakrika, degi áður en Guðmundur tilkynnti 19 manna hóp sem fer fyrir Íslands hönd á HM í handbolta í næsta mánuði.

Aron hefur um árabil verið með betri handboltamönnum heims og hann hefur einnig borið fyrirliðabandið í íslenska landsliðinu undanfarin ár.

Eftir að Guðmundur kynnti hópinn fékk Stefán Árni Pálsson, stjórnandi Seinni bylgjunnar, landsliðsþjálfarann í stutt spjall og spurði meðal annars út í endurkomu Arons til FH. Guðmundur segist skilja ákvörðun leikmannsins vel og hefur ekki áhyggjur af því að hún muni koma til með að koma niður á þeim gæðum sem Aron hefur upp á að bjóða.

„Ég átti samtal við Aron í aðdraganda þess að hann tók þessa ákvörðun og ég skil hann mjög vel,“ sagði landsliðsþjálfarinn.

„Ég hef engar áhyggjur af því gagnvart hans handbolta. Hann er að fara í gott lið og gott umhverfi og ég skil þessa ákvörðun mjög vel og finnst hún bara góð á endanum. Hann mun bara halda sér í toppstandi eins og hann hefur alltaf verið.“

Klippa: Guðmundur um endurkomu Arons til FH
Handbolti HM 2023 í handbolta

Mest lesið


Fleiri fréttir

Sjá meira


×

Mest lesið