Sér sjálfan sig í öðru ljósi eftir að myndin kom út

Hann segir að gerð heimildarmyndarinnar hafi styrkt sig alveg gríðarlega.

„Mér finnst ég vera allt annar maður.“

Myndin hefur vakið verðskuldaða athygli síðustu mánuði en þar heyrum við sögu Árna sem 73. aldursári kemst óvænt að því hver faðir hans kann að hafa verið. Í myndinni er Árna fylgt eftir í leit að svörum um uppruna sinn. 

Árni og Viktoría ræddu myndina í þættinum Reykjavík síðdegis á Bylgjunni. Viðtalið má heyra í spilaranum hér fyrir neðan. 

 Vildi komast í næsta kafla

„Þetta byrjaði með útvarpsþætti árið 2017,“ útskýrir Viktoría. Í kjölfarið af útvarpsþáttunum Ástandsbörn hafði bandarískur maður samband við hana þar sem hann taldi sig eiga hálfbróður á Íslandi. Þá gerði hún þáttinn Á ég hálfbróður á Íslandi þar sem fólk fékk að kynnast Árna. Hún vissi svo strax að hún vildi halda áfram með söguna.

„Ég bara óð af stað og allt í einu vorum við komin upp í flugvél á leið til Bandaríkjanna að fara að taka upp einhverja mögulega heimildarmynd.“

Útkoman varð heimildarmyndin Velkominn Árni sem Viktoría gerði ásamt Allan Sigurðssyni. Þetta var langt ferli en vel þess virði. Myndin hlaut sem dæmi áhorfendaverðlaun Skjaldborgar á síðasta ári, sem er hátíð íslenskra heimildakvikmynda.

„Ég var alveg til í að halda áfram með þessa sögu og reyna að komast í næsta kafla,“ segir Árni um myndina. 

Ekki á leið í samband

Velkominn Árni er þroskasaga manns sem hefur ekki alltaf þorað að fylgja eftir draumum sínum.

„Ég lifði mjög fábrotnu lífi og var bara piparsveinn,“ segir Árni um lífið fyrir þessa leit að upprunanum. 

„Líf mitt í dag er bara mjög gott. Ég er orðinn 77 ára og ennþá piparsveinn, þrátt fyrir ótal bónorð,“ segir Árni og hlær.  „Ég er ekkert að hugsa mér að fara að breyta því neitt.“

Hreyfði við fólki

Árni er í dag í samskiptum við ættingja sína Vestanhafs og hálfbróðir hans David kemur reglulega til Íslands ásamt eiginmanni sínum. Hann segir að fólk stoppi sig út á götu og ræði myndina.

„Maður finnur að fólki er hjartans alvara. Þetta er ekki bara eitthvað yfirborðslegt hjal, það er eitthvað sem hefur hreyft við því. Margir tengja við þetta.“

Árni var að gefa út ljóðabókina Seyðingur sem komin er í sölu hér á landi. 

„Ég horfi bara björtum augum fram á veginn.“

Viktoría útilokar ekki að fara með myndina áfram út í heim. 

„Ég  held að þetta sé saga sem eigi erindi víða.“