Allt hafi farið tiltölulega vel í hvellinum sem kom og fór hratt

Óvissustigi Almannavarna var lýst yfir á öllu landinu í gærkvöldi og samhæfingarstöð opnuð klukkan fimm í morgun. Fyrsta appelsínugula viðvörunin tók gildi klukkan sex í morgun og er síðasta appelsínugula viðvörunin í gildi til klukkan hálf tvö í dag á Austfjörðum.

Elín Björk Jónasdóttir, veðurfræðingur hjá Veðurstofunni, segir versta veðrið núna á norðaustan og austanverðu landinu, þar sem hvað hvassast er í kringum Kópaskeri og Raufarhöfn, sem og á Austfjörðum, þar sem líklega á eftir að hvessa meira, og undir Vatnajökli.

„Þetta gengur síðan bara eins og spár gerðu ráð fyrir áfram til austurs og verður svona meira og minna úr sögunni á milli eitt og tvö í dag. Í kjölfarið er suðvestanátt hérna vestantil á landinu með dimmum éljum og stundum takmörkuðu skyggni, en það verður ekki jafn mikil úrkoma eða éljagangur á austanverðu landinu þegar veðrið hefur runnið sitt skeið,“ segir Elín.

Vefur Veðurstofunnar lá niðri í dag en talið er að rafmagnstruflanir sem urðu í morgun hafi haft áhrif á kerfi þeirra. Hægt var þó að veita flugveðurþjónustu og þjónustað viðbragðsaðila og var unnið að því að endurræsa kerfin fyrir hádegi.

Flugsamgöngur að komast í eðlilegt horf en áfram þungfært á vegum

Ákveðið var að loka vegum á borð við Hellisheiði, Þrengslin og Mosfellsheiði um tíma í morgun. Áfram er hálka, skafrenningur og þæfingsfærð víða. Á Vestfjörðum, Norðurlandi og Austurlandi eru vegir lokaðir á nokkrum stöðum, samkvæmt upplýsingum á vef Vegagerðarinnar. 

Þá voru raskanir á flugsamgöngum en Guðni Sigurðsson, upplýsingafulltrúi Icelandair, segir ferðum frá Norður Ameríku og til Evrópu hafa verið aflýst í morgun.

„Veðrið gekk þarna yfir akkúrat á þeim tíma sem að flug var að koma inn frá Ameríku og út til Evrópu en við búumst við að við verðum að mestu leyti á áætlun núna eftir hádegi,“ segir Guðni. Um 800 farþegar hafi nýtt sér það að flýta ferðum eða seinka þeim um einn dag sem hafi hafi hjálpað mikið til. 

Staðan á Keflavíkurflugvelli sé nú betri þar sem hið versta er gengið yfir. „Það fylgdi þessu líka mikil hálka og snjókoma á flugvellinum og nú er bara unnið að snjóhreinsun þannig hægt sé að starfrækja flugið eftir hádegi,“ segir hann.

Hvað innanlandsflug varðar var því aflýst seinni partinn í gær en stefnt er á að fljúga til Akureyrar og Egilstaða eftir hádegi.

Getum haldið áfram með lífið eftir hádegi

Hjördís Guðmundsdóttir, samskiptastjóri almannavarna, segir þau reikna með að óvissustigi verði aflétt fljótlega eftir hádegi þegar síðustu viðvaranir hafa runnið sitt skeið.

„Þetta kom hratt inn eins og búist var við og fór hratt, sem að voru góðu fréttir dagsins. Það voru sem betur fer fáir á ferli snemma í morgun þegar veðrið fór svona helst yfir, alla vega hér á höfuðborgarsvæðinu,“ segir Hjördís og bætir við að veðrið hafi verið slæmt víða þó einhverjir hafi kannski ekki tekið eftir því.

Nokkuð var um að bílar sátu fastir og þurfti meðal annars að bjarga fólki af Hellisheiðinni og þar um kring. Björgunarsveitir hafi verið til taks til að koma fólki til byggða en þar sem fólk hafi síður verið á ferli þá hafi verið minna að gera og hafa þau ekki heyrt af foktjóni.

„Ég hugsa að þetta hafi bara farið eins vel og þetta gat farið, það hljómar alla vega þannig. Við höfum verið með samráðsfundi, fyrst klukkan sex í morgun með viðbragsðaðilum og aðgerðarstjórnum víða um land og svo aftur núna klukkan tíu, og það virðist vera að við getum bara haldið áfram með lífið okkar í hádeginu,“ segir Hjördís.