„Eins skrítið og það hljómar þá var ekki mikill ótti“

„Bara spenntur, kannski full spenntur fyrstu mínúturnar í þessum leik en náði aðeins að róa taugarnar og gaman að vera búinn að klára þetta, taka skrefið. Þetta var bara geggjað,“ sagði Aron Rafn í viðtali við Stöð 2 og Vísi. Viðtalið í heild sinni má sjá í spilaranum neðst í fréttinni.

„Tilgangslaust að standa í marki ef það væri einhver hræðsla“

„Nei, eins skrítið og það hljómar þá var ekki mikill ótti. Er búinn að vera rosalega mikið í kringum þetta, í markmannsþjálfun og í kringum bolta svo ég fann aldrei þessa hræðslu. Held það væri tilgangslaust að standa í marki ef það væri einhver hræðsla. Ég var ánægður að hafa tekið þetta skref og er ánægður með að halda áfram,“ sagði markvörðurinn aðspurður hvort það væri einhver ótti miðað við það sem á undan væri gengið.

Aron Rafn er þó vel varinn þegar hann stendur í marki en hann spilar með hjálm ekki ósvipaðan þeim sem knattspyrnumarkvörðurinn Petr Čech spilaði lengi vel með eftir að hafa lent í skelfilegum höfuðmeiðslum.

„Þurfum að vernda markverðina“

„Smá yfirlýsing. Þetta er búið að vera mikið í umræðunni, mikið af höfuðhöggum og margir að detta út. Mikið af markmönnum sem eru búnir að detta út. Upp á síðkastið eru margir markmenn í Danmörku til dæmis að spila með svona hjálma.“

„Langaði að sýna að þetta skiptir máli. Ég væri til í að þetta væri skylda. Við þurfum að vernda markverðina. Þurfum að sýna þeim virðingu. Það eru að koma skotum í hausinn og þá er um að gera að vera með eitthvað til að verja þá. Það eru til margar rannsóknir sýna fram á að hjálmurinn hjálpi, ég trúi þeim.“

„Er búinn að vera með þetta á öllum æfingum, alltaf. Eina sem er vont en kannski gott fyrir samherjana er að ég á erfiðara með að rífa kjaft, þess vegna er ég með þetta laust núna,“ sagði Aron Rafn og hló.

Sem betur fer var Aron Rafn með hjálminn í gær því Haukar fengu á sig vítakast sem fór ekki betur en svo að andstæðingurinn smellti boltanum í höfuðið á Aroni.

„Það var smá misskilningur hjá Starra [Friðrikssyni] þarna, hann missti boltann að hans sögn. Ég er í marki og mátti alveg búast við því að fá boltann í hausinn. Menn eru bara að reyna skora og þetta var óheppilegt. Ég get ekki kvartað yfir því að liðið mitt hafi ekki bakkað mig upp. Var mjög ánægður með það.“

„ Sá að það var enginn ásetningur í þessu hjá Starra. Fyrir svona tíu árum hefði ég sennilega hjólað í hann en maður eldist og er með smá reynslu.“

„Einn dagur í einu, þetta leiðinlega“

„Ég er klárlega kominn yfir ákveðinn hjalla. Margt eftir, formlega og svona. Að spila 45 mínútur í gær var mögulega 15 mínútum of mikið, ég veit það ekki. Ég byrjaði að standa í marki milli jóla og nýárs. Er búinn að standa í marki í tæplega sex vikur en tökum bara einn dag í einu, þetta leiðinlega. Ég er að stefna á að klára þetta tímabil og svo sjáum við hvað gerist,“ sagði hinn 33 ára gamli Aron Rafn að lokum.