Byggja nýja blokk á bestu lóð Bíldudals

Kristján Már Unnarsson skrifar 27. febrúar 2023 20:40

Björn Hembre er forstjóri Arnarlax á Bíldudal. Steingrímur Dúi Másson

Tíu íbúða fjölbýlishús er í smíðum á Bíldudal, það stærsta sem þar hefur risið í nærri hálfa öld. Sveitarfélagið Vesturbyggð og fyrirtækið Arnarlax beittu sér fyrir húsbyggingunni og vonast menn til að fljótlega verði byggt annað álíka stórt, svo mikil er húsnæðisþörfin.

Í fréttum Stöðvar 2 kom fram að uppbygging bæði kalkþörungavinnslu og fiskeldis hafi leitt til mikillar grósku á Bíldudal. Þannig lét Íslenska kalkþörungafélagið byggja átta íbúða hús á Bíldudal fyrir fimm árum. Mikill vöxtur fiskeldis knýr á um enn fleiri íbúðir en Arnarlax er núna langfjölmennasti vinnustaðurinn þar, með milli 120 og 130 starfsmenn.

Húsið er á sjávarlóð skammt frá íþróttahúsinu.Steingrímur Dúi Másson

„Það er mjög mikilvægt að hafa stað til að búa á. Við verðum að reyna að fá fleiri íbúðir fyrir fólk á svæðinu. Það er afar mikilvægt,“ segir Björn Hembre, forstjóri Arnarlax.

Það var síðast árið 1979 sem Bílddælingar sáu svo stóra blokk rísa í plássinu. Sveitarfélagið Vesturbyggð stendur að húsbyggingunni í samstarfi við Arnarlax og byggingafélagið Hrafnshól. Íbúðirnar verða ýmist seldar á markaði eða boðnar til leigu í gegnum Leigufélagið Bríeti.

Húsið er tveggja hæða með tíu íbúðum.KMU

Tíu íbúðir eru í nýja húsinu, bæði tveggja herbergja og þriggja herbergja, og verða þær afhentar fullbúnar um mánaðamótin maí-júní. Staðsetning hússins við fjöruborðið vekur athygli.

„Já, þetta er besta lóðin í bænum. Þetta er afar fallegur staður.

Þarna er rými fyrir fleiri íbúðir. Það verður næsta skrefið vonandi að við höldum áfram að byggja,“ segir Björn.

Svona á fjölbýlishúsið að líta út fullbyggt í sumar.Hrafnshóll

Þegar er farið að huga að öðru samskonar húsi, svo mikil er þörfin.

„Já, það er mikil þörf og sérstaklega hér á Bíldudal.

Margir starfsmenn búa á Tálknafirði og Patreksfirði sem gjarnan myndu vilja búa á Bíldudal. Það er því áfram mikil þörf fyrir íbúðir,“ segir forstjóri Arnarlax.

Hér má sjá frétt Stöðvar 2:

Vesturbyggð Fiskeldi Húsnæðismál Hús og heimili Byggðamál Tálknafjörður

Tengdar fréttir

Syngjandi kaupfélagsstjóri á Bíldudal

Staðurinn er eina verslunin á staðnum, veitingastaðurinn, kaffihúsið og barinn í bænum, auk þess að vera félagsmiðstöð bæjarbúa. Hér erum við að tala um Vegamót á Bíldudal þar sem kaupfélagsstjórinn á það til að taka upp gítarinn og spila og syngja fyrir viðskiptavini.

15. ágúst 2022 21:16

Ætla að byggja hátæknifiskvinnsluhús fyrir eldisfisk á Patreksfirði

Arnarlax og Vesturbyggð hafa undirritað viljayfirlýsingu um uppbyggingu hátæknivinnsluhúss fyrir eldisfisk í Vesturbyggð. Áætlað er að um 100 störf skapist með nýju fiskvinnslunni og gert ráð fyrir að hægt verði að vinna allt að 80 þúsund tonn af eldisfiski í húsinu.

13. maí 2022 18:23

Mest lesið

Fleiri fréttir