Handtóku táninginn sem gerði Klopp brjálaðan

Unglingurinn reitti meðal annars Jürgen Klopp, knattspyrnustjóra Liverpool, til mikillar reiði þegar hann óð inn á völlinn og rann á skoska bakvörðinn Andy Robertson. Leikmaðurinn greip um ökkla sinn og virtist þjáður, og jós Klopp úr skálum reiði sinnar þegar unglingurinn var leiddur framhjá honum og í burtu af vellinum.

Liverpool gaf út í dag að þegar í stað hæfist rannsókn á atvikinu svo hægt væri að finna þann sem hljóp inn á völlinn í leyfisleysi, og að hann yrði settur í bann.

Skömmu síðar kom svo fram í yfirlýsingu lögreglu að sextán ára drengur hefði verið handtekinn, og að lögreglan ynni með knattspyrnufélaginu Liverpool í málinu.

Í yfirlýsingu Liverpool segir að ekkert afsaki svona ólíðandi og hættulega hegðun, og að félagið setji öryggi leikmanna, andstæðinga og stuðningsmanna í forgang.

Klopp hafði haft margar ástæður til að gleðjast í seinni hálfleiknum í gær þegar lærisveinar hans skoruðu sex mörk eftir að hafa komist í 1-0 skömmu fyrir leikhlé. Atvikið sem nefnt er hér að ofan var það eina sem skyggði á gleðina en það gerðist eftir að Roberto Firmino skoraði sjöunda mark Liverpool á 88. mínútu.

Robertson kláraði leikinn en hann lagði meðal annars upp fyrsta markið með frábærri sendingu á Cody Gakpo.