Orðinn 75 ára og ráðinn stjóri Crystal Palace

Hodgson, sem er 75 ára gamall, tekur við Palace af Patrick Vieira sem var rekinn á dögunum. Hodgson hefur þar með tíu daga til að koma sér inn í hlutina að nýju hjá Palace, eftir að hafa síðast stýrt liðinu 2017-2021, en nú er hlé á ensku úrvalsdeildinni vegna landsleikja. Palace hefur tapað síðustu fjórum leikjum sínum í röð og er í 12. sæti með 27 stig, aðeins þremur stigum frá fallsæti.

Eins og fyrr segir stýrði Hodgson liði Palace, sem hann var hjá sem strákur, í fjögur tímabil og endaði liðið í 11., 12., 14. og 14. sæti. Vieira tók svo við af Hodgson þegar samningur hans rann út.

Ray Lewington verður Hodgson á ný til aðstoðar sem þjálfari en Paddy McCarthy, sem stýrði Palace til bráðabirgða eftir brottrekstur Vieira, verður aðstoðarstjóri. Steve Parish, stjórnarformaður Palace, bauð Hodgson og Lewington velkomna aftur:

„Þessi staða sem við erum í er augljóslega mikil áskorun en við teljum að reynsla Roys og Rays, sem og þekking þeirra á félaginu og leikmönnum, ásamt Paddy muni hjálpa til við það bráða verkefni að halda okkur í deildinni,“ sagði Parish.