Dauð­þreytt á lé­legri þjónustu Póstsins og í­hugar að flytja úr landi

„Þjónustan hér úti á landi hjá Póstinum er skelfileg,“ segir Soffía Nönnudóttir, íbúi á Þingeyri sem hafði samband við fréttastofu, svo gáttuð var hún á málinu. Soffía pantaði þrjár vörur frá Rúmfatalagernum í síðustu viku og var ekkert annað í boði en að fá sendinguna með Íslandspósti.

„Þetta er bara glatað. Við erum öll farin að íhuga að fara bara. Þjónustan hérna er bara orðin hryllingur. Ég veit að við erum ekki ein í þeim pælingum hérna fyrir vestan.“

Þetta er ekki í fyrsta skiptið sem Soffía hefur bent á slæma þjónustu við íbúa á Þingeyri. Í nóvember 2009 ræddi hún við Fréttablaðið um áhyggjur sínar af því að börn hennar hefðu verið skikkuð af Vinnumálastofnun til þess að mæta vikulega í viðtal á Ísafirði og sækja þar námskeið. Gemlufallsheiði væri enda mjög vafasöm að vetri til og ferðirnar á milli Þingeyrar því verið hættulegar.

Árið 2016 sagði Soffía svo við DV að hún væri komin með upp í kok af þjónustu póstsins við Þingeyinga. Í samtali við Vísi segir hún ekkert hafa breyst síðastliðin sjö ár.

Svaf í sófanum í þrjár nætur

Soffía segir að um hafi verið að ræða þrjá pakka frá Rúmfatalagernum. Einn sé í nokkurri stærð. „Það er dóttir mín sem er að fá hann. Henni lofað því að þetta kæmi í dag. Því að þetta er rúm,“ útskýrir Soffía.

„Hún var búin að sofa í sófanum í tvo daga. Þetta varð þriðja nóttin af því að það er ekki hægt að standa við loforðin. Af því að Pósturinn í Reykjavík segir að þetta eigi að vera svona. Excel skjalið í Reykjavík virkar bara ekkert úti á landi.“

Á endanum hafi dóttir hennar þurft að hringja og standa fast á sínu við starfsmenn Póstsins til þess að fá rúmið loksins sent heim að dyrum.

„Við erum að tala um rúm sem er 180x2. Þetta stendur þarna inni á pósthúsi. Við fengum þær skýringar að það hefði verið annað drasl fyrir og þetta yrði ekki komið til okkar fyrr en daginn eftir. Þá sagði dóttir mín hingað og ekki lengra og Pósturinn sendi okkur pakkana loksins.“

Fermingargjöfin fór til Ísafjarðar í stað Eskifjarðar

Soffía segist eiga aragrúa af dæmum þess að póstþjónustan virki ekki sem skyldi á Þingeyri. Hún rifjar upp þegar hún hafi sent barnabarninu sínu fermingargjöf í apríl sem býr hinumegin á landinu á Eskifirði.

„Ég ætlaði að hafa góðan tíma til að senda honum þetta, því ég vildi að hann fengi þetta fyrir fermingardaginn sinn. Þetta var ekki lítill pakki, þetta var 32 tommu sjónvarp. Það fer með bíl á mánudegi frá Þingeyri og þá átti þetta að ná bílnum sem fór suður sama dag.“

Daginn eftir hafi Soffía hins vegar fengið skilaboð frá Póstinum um að sendingin hefði verið send til Ísafjarðar fyrir slysni.

„Hvernig gátu þeir missent þetta á Ísafjörð? Ég þurfti að hringja og rífast og rífast og hann rétt náð austur fyrir ferminguna hjá barninu.“

Hún nefnir fleiri dæmi. „Ég veit ekki hversu oft ég hef verið að fá pakka og þetta fer á Patreksfjörð eða eitthvert annað. Þetta er allskonar bullshit.“

Soffía bætir því við að Þingeyringum sé jafnframt gert að sækja minni sendingar í póstbox á Ísafirði. „Mynduð þið vilja keyra til Keflavíkur til þess að sækja póst í póstbox? Því það er jafn löng leið fyrir okkur að keyra á Ísafjörð í póstbox og ég efast um að þeir í bænum viti það.“

Skorar á verslanir í Reykjavík að fjölga sendingarleiðum

Soffía segir það furðulegasta mál að ekki sé hægt að velja á milli fleiri aðila en Póstsins þegar verslað er í reykvískum verslunum á netinu.

„Þetta er svo skrítið. Það er bara rúmt ár síðan að við gátum valið á milli Póstsins eða Landflutninga. Núna getum við það ekki.“

Hún segist skora á verslanir í Reykjavík að veita landsbyggðinni kost á því að velja á milli Póstsins og Eimskips. „Ég get lofað þér því að Eimskip á eftir að hafa nóg að gera.“

Íhugar alvarlega að flytja úr landi

Soffía segist vera komin með nóg af bágri þjónustu úti á landi. Hún segist íhuga alvarlega að flytja og ekki af landsbyggðinni heldur af landi brott.

„Það er bara þannig að ef þú ákveður að þú vilt búa úti á landi, þá verður þú bara að sætta þig við það að vera annars flokks þegn í þjóðfélaginu eða þriðja flokks. Þær myndu ekkert sætta sig við þetta í Reykjavík.“

Soffía segist áður hafa búið á landsbyggðinni í Noregi og í Danmörku, en aldrei kynnst annarri eins þjónustu og hér á landi.

„Það er ekki hægt að líkja þessu saman. Við bjuggum ekki í borg. En ef ég pantaði eitthvað þá var það komið nánast daginn eftir. Ég pantaði alla leið frá Osló og ég bjó fyrir utan Stavanger. Það er langt á milli en þetta var samt komið daginn eftir.“

Hún segir ekki koma til greina að búa annars staðar en á landsbyggðinni, þó ekki endilega á Íslandi.

„Ég á bara ekki til orð yfir þetta. Maður er bara búinn að gefast upp á þessu. Sumir flytja aldrei en ég bara flyt út aftur. Ég hef engan áhuga á að búa í Reykjavík eða í borg en ég ætla ekki að búa við þetta. Það er bara ekki í boði. “

Heldurðu að þú myndir flytja aftur til Noregs?

„Já alveg eins. Ég bjó þar í mörg ár. Við fengum góða þjónustu, þar voru læknar og eitthvað sem við þurftum ekki að díla við þar. Það virðist allt vera að fara fjandans til hérna og þeir inni á háa Alþingi virðast ekkert ætla að gera.“

Sjaldgæft að pakkar ílengist á landsbyggðinni

Í svörum við fyrirspurn Vísis vegna málsins frá Vilborgu Ástu Árnadóttur, markaðsstjóra Póstsins, segir að það komi ekki oft fyrir að pakkar ílengist í bæjum með þessum hætti.

„Hins vegar geta komið upp aðstæður sem setja strik í reikninginn, svo sem frídagar, óvenju mikið pakkamagn, lokaðar flutningsleiðir og svo framvegis. Við leggjum áherslu á að upplýsa fólk ef slíkar aðstæður koma upp og við reynum að gera það eftir fremsta megni.“

Misbrestur geti orðið á því og þá sé starfsfólk Póstsins þakklátt fyrir að vera látið vita svo hægt sé að bregðast við, beðist velvirðingar og lært af mistökunum. Vilborg segir að pökkum sé dreift alla virka daga í þéttbýli á landsbyggðinni en tvisvar í viku í dreifbýli.

„Pakkasendingum er sem sagt dreift á landsbyggðinni daginn eftir póstlagningu svo framarlega sem þær eru póstlagðar fyrir ákveðinn tíma.“

Uppfært klukkan 17:44 með yfirlýsingu frá Póstinum að neðan

Í dag birtist frétt á Vísi þar sem Pósturinn er gagnrýndur fyrir töf á sendingu sem átti að berast til Þingeyrar.

Upp kom sú staða í byrjun maí að íbúi á Þingeyri átti von á sendingu sem barst ekki á réttum tíma. Það voru samverkandi þættir sem ollu því að sendingin var ekki afhent á réttum tíma,t.d. var óvenju mikið pakkamagn miðað við árstíma og lokaðar flutningaleiðir. Sem betur fer kemur það ekki oft fyrir að tafir verði á pakkasendingum frá höfuðborgarsvæðinu til Vestfjarða. Þess má geta að í apríl voru 97,6% sendinga, eða tæplega 98 sendingar af 100, afhentar á réttum tíma. Þegar sendingar tefjast leggur Pósturinn áherslu á að upplýsa fólk um það. En það getur orðið misbrestur á því og í þessu tilviki voru mistök að láta viðskiptavininn ekki vita að sendingin kæmi ekki á réttum tíma.

Okkur þykir afar leitt að hafa ekki upplýst viðskiptavininn í þessu tilviki og að sendingin hafi borist of seint. Við erum þakklát þegar fólk lætur okkur vita svo við getum brugðist við, beðist velvirðingar og lært af mistökunum. Nú hefur verið skerpt á verklagi til að koma í veg fyrir að slík mistökendurtaki sig.

Þjónustan á Þingeyri er þannig að það kemur póstbíll 5 daga vikunnar á staðinn og dreifir pökkum alla virka daga og bréfum tvisvar í viku. Ef sendingar komast ekki með fyrstu ferð til Þingeyrar frá Ísafirði hefur Pósturinn samband við viðtakanda og farin er aukaferð. Það á því enginn að þurfa að sækja sendingar á Ísafjörð, hvorki í póstbox né á pósthúsnema óskað hafi verið eftir því. Ef viðskiptavinir eru ekki heima í fyrstu afhendingartilraun þá fer sendingin á Ísafjörð en við bjóðum þeim að koma aftur með sendinguna síðar.

Starfsmenn Póstsins reyna eftir bestu getu að fylgja þessu verklagi en hins vegar getur alltaf eitthvað komið upp á. Pósturinn tekur öllum ábendingum fagnandi því við erum sífellt að leita leiða til að bæta okkur.