Dagskráin í dag: Undanúrslit Olís-deildarinnar, Mílanóslagur í Meistaradeildinni, Besta-deildin og fleira

Stöð 2 Sport

FH tekur á móti ÍBV í þriðja leik liðanna í undanúrslitum Olís-deildar karla í handbolta í kvöld þar sem Eyjamenn leiða einvígið 2-0. FH-ingar þujrfa því nauðsynlega á sigri að halda til að halda einvíginu á lífi, en upphitun fyrir leikinn hefst á slaginu klukkan 18:30.

Sérfræðingar Seinni bylgjunnar verða svo í Kaplakrika að leik loknum og gera leikinn upp.

Þá verða Bestu mörkin einnig á dagskrá á Stöð 2 Sport í kvöld klukkan 21:45 til að gera upp leiki dagsins í Bestu-deild kvenna í knattspyrnu.

Stöð 2 Sport 2

Undanúrslit Meistaradeildar Evrópu eru farin á flug og AC Milan og Inter Milan mætast í Mílanóslag í undanúrslitum í kvöld. Upphitun fyrir leikinn hefst klukkan 18:35 og við skiptum yfir á San Siro stundarfjórðungi síðar. Sérfræðingar Stöðvar 2 Sports taka svo við á ný að leik loknum og fara yfir allt það helsta.

Stöð 2 Sport 5

Íslandsmeistarar Vals fá Selfyssinga í heimsókn í Bestu-deild kvenna í knattspyrnu klukkan 19:05 og á sama tíma mætast Þróttur og Stjarnan á hliðarrás Bestu-deildarinnar.

Stöð 2 eSport

Fjórða umferð BLAST.tv Paris Major mótsins í CS:GO fer fram í dag og hefst upphitun strax klukkan 09:00. Leikið verður í allan dag áður en sérstakur aukaþáttur af Stjóranum hefst klukkan 21:00.