Hætta við lokun flugvallar vegna orkuskipta í flugi

Fjallað var um málið í fréttum Stöðvar 2 en deilum um Bromma-flugvöll svipar mjög til þeirra sem verið hafa um Reykjavíkurflugvöll.

Bromma var aðalflugvöllur Stokkhólms allt fram á þotuöld þegar millilandaflugið færðist að mestu yfir á Arlanda-flugvöll. Innanlandsflug smærri flugvéla hélst áfram á Bromma en einnig takmarkað millilandaflug. Þá er þar einka- og kennsluflug. Flugfloti sænska ríkisins, sem flytur æðstu ráðamenn og konungsfjölskylduna, er staðsettur á vellinum og einkaþotur forstjóra eru tíðir gestir.

Bromma er átta kílómetra frá miðborg Stokkhólms meðan 42 kílómetrar eru til Arlanda. Eftir að hraðlest stytti ferðatímann milli Arlanda og miðborgarinnar niður í átján mínútur jókst þrýstingur á lokun Bromma og árið 2014 ákvað vinstrimeirihluti borgarstjórnar Stokkhólms, í samstarfi við ríkisstjórn sömu flokka, að stefna að lokun vallarins. Fyrir tveimur árum ákvað svo sænska ríkisstjórnin með stuðningi borgarstjórnar að vellinum skyldi lokað árið 2025 og svæðið tekið undir fjölbýlishús.

Vinstri stjórnin féll hins vegar í haust. Við tók ríkisstjórn hægri flokkanna og hún lýsti því strax yfir að ákvörðun um lokun Bromma-flugvallar yrði snúið.

Og nýlega tók innviða- og húsnæðismálaráðherra Svíþjóðar, Andreas Carlson, af skarið um að Brommaflugvöllur skyldi starfræktur að minnsta kosti til ársins 2038. Í viðtali við sænska ríkissjónvarpið sagði ráðherrann að Bromma yrði í lykilhlutverki í orkuskiptum í fluginu sem stefndi í að gætu gerst mjög hratt. Því væri beinlínis óskynsamlegt og ótímabært að leggja flugvöllinn niður.

Vinstrimeirihlutinn í borgarstjórn Stokkhólms hefur mótmælt þessari ákvörðun harðlega og sagt hana svik við íbúa Stokkhólms. Það sé ekki ásættanlegt á tímum húsnæðisskorts að húsnæðisráðherra Svíþjóðar stöðvi þannig skyndilega uppbyggingu nýs íbúðarhúsnæðis fyrir tugþúsundir íbúa.

Innanlandsflug frá Bromma er núna til þrettán staða í Svíþjóð og millilandaflug til fjögurra borga; til Århus, Brussel, Helsinki og Salzburg. Þá má geta þess að í síðustu viku tilkynnti Finnair að það hygðist í haust hefja á ný beint flug milli Helsinki og Bromma og stefnir félagið á ellefu ferðir í viku á sjötíu sæta ATR 72-500 skrúfuþotum.

Hér má sjá frétt Stöðvar 2: