Tveggja leitað í rústunum og nær fjöru­tíu slasaðir

Sprengingin átti sér stað í húsi sem hýsti hönnunarskóla og höfuðstöðvar kaþólska menntakerfisins. Húsið er staðsett á götunni Saint-Jacques í 5. hverfi Parísar, við hlið Val de Grâce kirkjunnar. 

Samkvæmt BBC standa björgunaraðgerðir enn yfir þar sem tveggja er leitað í rústunum.

Ekki er enn vitað um upptök sprengingarinnar en samkvæmt saksóknarembættinu er líklegt að sprengingin hafi átt sér stað innan hússins.

Gérald Darmanin, innanríkisráðherra Frakklands, fór að slysstaðnum í dag. Hann segir þefhunda hafa þefað uppi mögulegar staðsetningar þeirra sem enn týndir eru eftir sprenginguna.