Innlent

Steinbítur leyfði kafara að setja sýnatökupinna upp í sig

Kristján Már Unnarsson skrifar
Hann kallast grábítur fyrir austan. En er hann í raun steinbítur eða sérstök tegund?
Hann kallast grábítur fyrir austan. En er hann í raun steinbítur eða sérstök tegund? Erlendur Bogason

Eftir covid-faraldurinn er landsmönnum eflaust flestum enn í minni hvernig var að láta stinga pinna upp í sig til sýnatöku. En hvernig skyldi steinbítur bregðast við slíku? Kafarinn Erlendur Bogason ákvað að prófa sömu aðferð til að ná DNA-sýni úr svokölluðum grábít til að fá úr því skorið hvort hann væri í raun steinbítur eða sérstök tegund.

Í frétt Stöðvar 2 mátti sjá myndir sem teknar voru í Eyjafirði en Erlendur segir steinbít yfirleitt feiminn við mannfólkið og hann forði sér þegar kafari nálgast. Oftast haldi hann sig þó undir steinum eða í holum eða sprungum þar sem hann hefur skjól.

En það er annar svipaður fiskur, sem Erlendur segir að kallist grábítur fyrir austan. Hann sé alltaf til í slag, hræðist ekki kafara og virðist öðruvísi útlits.

Hversu fast bítur steinbítur? Erlendur ákvað að prófa með því að stinga fingri upp í hann.Erlendur Bogason

Erlendur segist hafa nokkrum sinnum mætt grábítum á ferli sínum sem kafari undanfarin þrjátíu ár, þeir séu minni en venjulegur steinbítur, öðruvísi á litinn, en auðþekkjanlegir og ógnandi.

Honum lék forvitni á að fá svar við þeirri spurningu hvort grábítur væri í raun steinbítur eða sérstök tegund eða steinbíts bróðir. Einfaldast hefði auðvitað verið að veiða hann og rannsakan hann dauðan en Erlendur vildi ekki drepa hann.

Hin leiðin var að afla DNA-sýnis úr lifandi fiski og það var einmitt það sem Erlendur gerði. Fór með sýnatökupinna og athugaði hvort hægt væri að stinga honum upp í grábítinn. Og viti menn; fiskurinn leyfði sýnatökuna.

Erlendur Bogason kafari potar sýnatökupinna upp í steinbítinn.Erlendur Bogason

Núna hefur Matís greint sýnið og er niðurstaðan sú að grábítur kemur út sem steinbítur. Það útiloki þó ekki að hann sé undirtegund, jafmvel sérstakur stofn eða að tegundarmyndun sé í gangi.

En Erlendur vildi líka vita hversu fast hann bítur. Það var því ekkert annað í stöðunni en að prófa. Hvort þetta hafi verið vont svarar Erlendur að hann sé að minnsta kosti ennþá með tíu fingur.

Hér má sjá frétt Stöðvar 2:

Hörgársveit Vísindi Sjávarútvegur

Tengdar fréttir

Kafari náði mögnuðum myndum af þéttri loðnutorfu við Hjalteyri

Kafari sem var að tína skeljar á hafsbotni í Eyjafirði í byrjun vikunnar upplifði það að þétt loðnutorfa var skyndilega farin að synda í kringum hann. Sérstaka athygli vekur að loðnan var óhrygnd, sem styrkir vísbendingar um breytt hegðunarmynstur og að hún hrygni í auknum mæli við Norðurland.

Rannsaka hverastrýtur í Eyjafirði til að öðlast skilning á upphafi lífs

Alþjóðlegur hópur vísindamanna, kostaður af geimvísindastofnun Bandaríkjanna, NASA, rannsakar nú hverastrýturnar í Eyjafirði í því skyni að kanna hvort líf hafi getað þróast á Mars og til undirbúnings frekari könnunarleiðöngrum til reikistjörnunnar. Jafnframt er vonast til að strýturnar gefi svör um líkur á lífi á öðrum hnöttum í sólkerfinu.

Kafaði niður í loðnutorfu í Faxaflóa og kvikmyndaði

Íslenskur kafari kvikmyndaði loðnutorfu í síðasta mánuði með því að kafa sjálfur niður í torfuna. Ekki er vitað til þess að slíkt hafi áður verið gert í heiminum. Kafarinn lýsir þessu sem ævintýri.

Erlendur er verndari eins af neðansjávarundrum heims

Erlendur Bogason, kafari á Hjalteyri, sýndi áhorfendum inn í ævintýraheim undirdjúpanna í Eyjafirði í þættinum "Um land allt“ á Stöð 2. Þar er að finna hinar mögnuðu hverastrýtur sem voru friðlýstar sem náttúruvætti árið 2001.

Kafarinn fær að strjúka steinbítnum í Eyjafirði

Steinbíturinn vill láta strjúka sér á hökunni og maganum, segir Erlendur Bogason, kafari á Hjalteyri, en hann hefur náð að tengjast steinbít í köfunarferðum sínum niður að hinum mögnuðu hverastrýtum á botni Eyjafjarðar.

Mest lesið


Fleiri fréttir

Sjá meira


×

Mest lesið