Roberto Mancini hættur með ítalska landsliðið

Mancini tók við liðinu 2018 eftir að Gian Piero Ventura tókst ekki að tryggja Ítalíu á lokakeppni HM 2018. Við tók ákveðið uppbyggingartímabil þar sem margar af reyndustu stjörnum Ítala lögðu landsliðsskóna á hilluna. Mancini tókst að blása lífi í liðið á ný og má segja að hápunktinum hafi verið náð á EM 2020 þar sem liðið lagði England í úrslitaleiknum eftir vítaspyrnukeppni.

Árið 2022 var Ítalía annað heimsmeistaramótið í röð ekki á meðal þeirra þjóða sem tóku þátt í lokakeppninni. Mancini hélt þó starfi sínu en hefur nú ákveðið að segja þetta gott og hefur sagt starfi sínu lausu. Hann stýrði liðinu alls í 61 leik, vann 37, tapaði 15 og gerði níu jafntefli.

Ítalíu situr í 8. sæti heimslistans og í þriðja sæti C-riðlis í undankeppni EM en liðið hefur leikið tvo leiki í riðlinum. Ítalska knattspyrnusambandið sagði í yfirlýsingu að eftirmaður Mancini yrði kynntur á næstu dögum. Luciano Spalletti hefur verið orðaður við starfið en hann er í árs hvíldarleyfi frá störfum sínum hjá Napólí.