Vålerenga styrkti stöðu sína á toppnum

Fyrir leikinn í dag var Vålerenga með fjögurra stiga forskot á Rosenborg á toppi deildarinnar með einum leik meira spilaðan. 

Sigurinn í dag var þægilegur. Vålerenga komst í 4-0 strax í fyrri hálfleiknum og sigurinn í höfn þegar flautað var til hálfleiks. Bæði lið bættu einu marki við eftir hlé og lokatölur því 5-1.

Ingibjörg lék allan leikinn í vörn Vålerenga sem er nú sjö stigum á undan Rosenborg sem á tvo leiki til góða. Selma Sól Magnúsdóttir leikur með Rosenborg og því stefnir í baráttu þessara tveggja landsliðskvenna um norska meistaratitilinn.