Spænskir vindar blása um miðbæ Reykjavíkur

Andi spænskrar matarmenningar svífur þar sannarlega yfir vötnum en tvær fjölskyldur, hálfspænskar og hálfíslenskar standa að veitingastaðnum ásamt spænskum kokki. Sjálfur er Dagur hálf spænskur og hálf íslenskur en fæddur og uppalinn í Bercelona og Zoe Sarsanedas, konan hans er spænsk. Elma Backman er íslensk og maðurinn hennar Albert Muñoz er frá Barcelona. Kokkurinn og paellumeistarinn Pedro Lopez ræður ríkjum í eldhúsinu ásamt Degi en Pedro rak veitingastað í Alicante í 25 ár áður en hann flutti til Íslands.

Hópinn hafði lengi dreymt um að opna saman veitingastað og lét loks drauminn rætast, eftir að hafa boðið upp á ekta spænskar paellur í heimsendingu í nokkur ár.

„Við opnuðum La Barceloneta snemma í sumar og viðtökurnar fóru strax fram úr okkar björtustu vonum, bæði hjá heimafólki og ferðamönnum. Það varð strax miklu meira að gera en við áttum von á,“ segir Dagur. „Við tókum þátt í Menningarnótt og það varð alveg brjálað að gera hjá okkur. Fólk er greinilega að fylgjast spennt með allskonar matarmenningu, sem er frábært,“ segir Dagur.

„Við einblínum á hefðbundinn mat frá mismunandi svæðum á Spáni og eldum réttina alveg eftir hefðinni. Okkur finnst mikilvægt að það komist til skila hvaða réttir þetta eru og hvaðan,“ útskýrir Dagur. „Við völdum öll réttina í sameiningu sem eru á matseðlinum og þetta eru klassískir réttir eins og kolkrabbi, sem er afar vinsæll matur á Spáni og eins Croquettes og svo Paellan sem er einkennandi fyrir Valencia og okkar sérsvið.

 Það má skipta matseðlinum í tvo flokka, tapas og paellur en gestirnir blandar þessu oftast saman og nánast allir panta sér paellu. Pedro er líka algjör sérfræðingur í paellum og með yfir 40 ára reynslu,“ segir Dagur. Opið er inn í eldhús og geta gestir fylgst með þeim félögum elda matinn sem eykur enn á stemninguna. Pedro og Dagur búa einnig til allar kryddblöndur frá grunni og flytja hráefnið beint inn frá Spáni.

Markmiðið með veitingastaðnum er að búa til alvöru spænska upplifun og þau leggja mikinn metnað í alla umgjörð og að innrétta staðinn í spænskum anda.

„Við fluttum inn flísar frá Katalóníu, lampa og húsgögn og milliveggirnir eru gegnsæir, sem er algengt í spænskum húsum. Staðurinn tekur um 30 til 40 manns svo hér skapast mjög kósý andrúmsloft,“ segir Dagur.