Gylfi Þór marka­hæstur

Gylfi Þór sneri aftur í byrjunarlið Íslands í kvöld þegar liðið tók á móti Liechtenstein í undankeppni EM 2024. Um er að ræða 80. landsleik Gylfa Þórs en hann hafði ekki byrjað leik með landsliðinu síðan 15. nóvember 2020.

Gylfi Þór hafði fyrir leik kvöldsins skorað 25 mörk og því var ljóst að hann gæti jafnað markametið og bætt það færi svo að hann myndi skora tvö mörk.

Gylfi Þór skoraði fyrsta mark kvöldsins úr vítaspyrnu sem var dæmd þegar varnarmaður gestanna hindraði fyrirgjöf hans með hendinni. 

Gylfi Þór fór sjálfur á punktinn og kom Íslandi 1-0 yfir. Í sömu andrá þá jafnaði hann markamet íslenska karlalandsliðsins en fyrir höfðu þeir Kolbeinn Sigþórsson og Eiður Smári Guðjohnsen skorað 26 mörk.

Það var svo í upphafi síðari hálfleiks sem Gylfi Þór skoraði annað mark sitt í leiknum með góðu skoti innan úr vítateignum. Var það hans 27. mark í treyju íslenska landsliðsins og er Gylfi Þór orðinn markahæsti leikmaður Íslands frá upphafi. 

Þegar fréttin er skrifuð er staðan 3-0 Íslandi í vil og enn 40 mínútur eftir af leiknum.

Hér má sjá lista yfir öll mörk Gylfa Þórs fyrir A-landsliðið.

Fréttin hefur verið uppfærð.