Rann­saka hvort kviknað hafi í út frá þurrkara

Rannsókn tæknideildar lögreglu á upptökum brunans er á fyrstu stigum. Skúli Jónsson, aðstoðaryfirlögregluþjónn hjá lögreglunni á höfuðborgarsvæðinu segir í samtali við fréttastofu að einn íbúi hússins, sem vaknaði við reykskynjara, hafi séð eld í þurrkara í eldhúsinu. 

Samkvæmt Skúla bjuggu sex manns á efri hæð hússins þar sem eldurinn kom upp. Altjón varð á hæðinni. Hann segir eiganda húsnæðisins hafa útvegað fólkinu gistingu.

Slökkviliði barst tilkynning um eldinn rétt fyrir klukkan sex í morgun. Þrír voru fluttir á slysadeild í kjölfarið en karlmaður á fertugsaldri er þungt haldinn.