Leikdagur í Stafangri: Fer leikplanið út um gluggann?

Leikmenn liðsins eru spenntir fyrir verkefninu, og eðlilega. Þetta er stærsta svið sem flestir þeirra hafa spilað á en aðeins tveir leikmenn, þær Þórey Rósa Stefánsdóttir og Sunna Jónsdóttir, hafa áður leikið á stórmóti.

Arnar Pétursson mun jafnframt stýra liði á stórmóti í fyrsta sinn og er ánægður með undirbúning liðsins fyrir komandi verkefni. Bæði hann og leikmenn sammælast um að þátttaka í stóru æfingamóti á við Posten Cup í aðdragandanum hafi verkað vel til að hrista mesta skrekkinn úr leikmönnum.

Óljóst er hvaða kröfur maður á gera til liðsins, enda ekki spilað á þessu stigi áður. Leikirnir á æfingamótinu töpuðust en þar skipta úrslit auðvitað minna máli en þegar komið er á heimsmeistaramót. Arnar hefur lagt áherslu á vegferðina sem liðið er á, og hafa sannarlega framfaraskref verið tekin síðustu misseri.

Að sama skapi er stórt skref að mæta á HM í fyrsta sinn, og má ekki gleymast að Ísland er þar sem boðslið og er í neðsta styrkleikaflokki. Arnar þarf að feta ákveðinn veg að tempra væntingar leikmanna liðsins en á sama tíma gera kröfur.

Leikplanið breytt?

Í dag hefur þjálfarateymið þó eflaust mestar áhyggjur af því hvort undirbúningur liðsins fyrir þennan sérstaka leik hafi verið með leikmann í huga sem alls ekki verður með.

Spurningamerki hafa verið sett við þátttöku Önu Gros, eins besta leikmanns heims og fyrirliða Slóveníu, en fyrir æfingu liðsins í keppnishöllinni í gær kvaðst Arnar þess fullviss að hún tæki þátt og vegna meiðsla í leikstjórnendastöðu slóvenska liðsins myndi sóknarleikur liðsins jafnvel snúast enn meira um Gros.

Samkvæmt frétt Peter Zalokar fyrir Slovenske Novice í gær kom Gros hins vegar ekki með liðinu til Stafangurs. Meðan 16 leikmenn flugu norður á bóginn hafi hún farið til Belgrað til frekari rannsókna og endurhæfingar vegna meiðsla í læri sem plagað hafa hana undanfarið.

Í fréttinni segir að jafnvel megi ekki gera ráð fyrir Gros fyrr en í leik Slóveníu við Angóla á laugardaginn, 1. desember.

Í fyrradag greindi slóvenska handknattleikssambandið frá því á heimasíðu sinni að Gros hefði enn ekki jafnað sig á meiðslunum og færi milli sérfræðinga víða um Evrópu í leit að mein bóta sinna.

Hvort að Gros verði svo með í leiknum kemur í ljós síðar í dag þegar Dragan Adzic, þjálfari Slóveníu, tilkynnir hópinn fyrir leikinn gegn Íslandi.

Adzic er afar fær þjálfari og tók þá ákvörðun, ef til vill vegna meiðslavandræðanna, að fara með slóvenska liðið í æfingabúðir síðustu vikuna í stað þess að spila æfingaleiki.

„Stelpurnar bíða í ofvæni eftir því að stíga út á völlinn, vegna þess að við spiluðum ekkert í aðdragandanum. Ég held að við séum vel undirbúnar fyrir leikinn við Ísland og svo munum við spila betur leik frá leik eftir því sem líður á keppnina,“ er haft eftir Adzic á vef slóvenska sambandsins í morgun.

Leikur Íslands og Slóveníu hefst klukkan 17:00 og verður lýst beint á Vísi og gerð góð skil.