Þeir segja hann hafa sigað stuðningsmönnum sínum á þinghúsið þann 6. janúar 2021, þar sem þeir ruddust inn með því markmiði að stöðva formlega staðfestingu úrslita kosninganna.
Í nýjum dómsskjölum sem saksóknarar hafa opinberað segjast þeir ætla að sýna fram á að Trump hafi bæði fyrir og eftir kosningarnar í nóvember 2020 dregið úr trúverðugleika á þær, með því markmiði að réttlæta tilraunir sínar til að snúa úrslitunum.
Þá segja þeir að það að Trump hafi stutt menn sem hafa verið ákærðir vegna árásarinnar fjárhagslega og hyllt þá sem hetjur, sýna fram á að hann hafi alltaf ætlað að brjóta af sér.
Trump hefur meðal annars heitið því að náða fólk sem hefur verið dæmt vegna árásarinnar, verði hann aftur kjörinn forseti í nóvember á næsta ári. Í dómskjalinu er sérstaklega nefnt að Trump hafi tekið hóp manna sem tóku þátt í árásinni á svið með sér á kosningafundum og talað um þá sem „gísla“.
Sjá einnig: Trump hóf kosningabaráttuna með kór uppreisnarmanna
Forsetinn fyrrverandi var fyrr á árinu ákærður vegna viðleitni sinnar og bandamanna sinna til að snúa úrslitum áðurnefndra kosninga, sem Joe Biden vann.
Segist saklaus
Í ákærunni gegn honum segir að Trump hafi rétt til þess að tala um kosningarnar og jafnvel til að segja ósatt og halda því fram að hann hafi unnið. Þá hafi hann einnig haft rétt á því að beita löglegum leiðum til að krefjast endurtalninga og rannsókna eftir kosningarnar og það hafi hann gert.
Þar segir að hann hafi þó ekki rétt til að beita ólöglegum leiðum og bellibrögðum til að snúa úrslitunum. Saksóknarar segja einnig að viðleitni Trumps hafi brotið gegn grunni lýðveldis í Bandaríkjunum.
Sjá einnig: „Almenningur á rétt á að þetta mál sé tekið fyrir hratt og örugglega“
Ákæran snýr ekki eingöngu að lygum hans um úrslit kosninganna heldur einnig tilraunir hans og bandamanna hans til að skipta út réttkjörnum kjörmönnum í sjö ríkjum.
Trupm hefur lýst yfir sakleysi sínu.
Donald Trump hefur verið ákærður fjórum sinnum á undanförnum mánuðum og er það fyrir utan umrædd réttarhöld í New York sem fjallað er um hér að ofan.
Jack Smith, sérstakur rannsakandi dómsmálaráðuneytis Bandaríkjanna, hefur ákært Trump í tveimur málum. Annað þeirra snýr að viðleitni hans til að snúa úrslitum forsetakosninganna í Bandaríkjunum árið 2020 á landsvísu. Réttarhöldin eiga að hefjast 4. mars.
Hitt snýr að opinberum gögnum og leynilegum skjölum sem hann tók með sér úr Hvíta húsinu þegar hann flutti til Flórída og neitaði að afhenta. Réttarhöldin eiga að hefjast í maí.
Hann hefur einnig verið ákærður í New York fyrir brot á lögum um kosningar vegna þagnargreiðslu til klámmyndaleikkonunnar Stormy Daniels. Réttarhöldin eiga að hefjast 25. mars.
Trump hefur þar að auki verið ákærður í Georgíu og fyrir að reyna að snúa úrslitum kosninganna þar. Ekki er búið að ákveða hvenær réttarhöldin í Georgíu eiga að hefjast en búið er að ákveða að sýnt verði frá þeim í beinni útsendingu.
