Myndin ber heitið Ásgeir - Maðurinn með Hattinn. Hún verður sýnd í Sambíóunum Kringlunni í dag á sérstakri sýningu og fjallar um Ásgeir Elíasson sem lést fyrir aldur fram árið 2007. Ásgeir gerði Fram að stórveldi og vann glæsta sigra með íslenska landsliðinu.
„Ég fékk fyndið símtal frá Hemma þar sem hann sagði bara: „Ég fattaði allt í einu að ég hef engan tíma í þetta og svo kann ég þetta ekki. Getur þú hjálpað mér að klára þetta?“ segir Logi Bergmann Eiðsson í samtali við Vísi og vísar þar til Hermanns Guðmundssonar sem fékk hugmyndina að myndinni og framleiddi myndina með honum.
Logi segir Ásgeir vera goðsögn sem breytt hafi boltanum á Íslandi með áherslu sinni á sóknarleik og skemmtun. Sjálfur þekkti hann Ásgeir í gegnum störf sín sem íþróttafréttamaður á Ríkisútvarpinu.
„Ég hitti hann oft og tók mörg viðtöl við hann þegar ég var íþróttafréttamður. Hann var mjög almennilegur og afslappaður og var svolítið eins og Arnar Gunnlaugsson. Hann gaf sér alltaf tíma til þess að fara yfir málin með manni og ræða hluti.“
Minningin að gleymast meðal yngri kynslóðarinnar
Logi segir Hermann hafa orðið var við það að saga Ásgeirs væri að gleymast meðal yngri fótboltamanna. Hann hafi langað til að varðveita hana.
„Það eru þessi áhrif sem hann hafði, sérstaklega eins og hjá Fram. Fram á gullöld og hún hverfist eiginlega öll um tíma Ásgeirs. Þetta er tíminn þar sem þeir eru bara stórveldi á Íslandi,“ segir Logi.
Hann segir það ekki síst vegna þess andrúmslofts sem Ásgeiri og eiginkonu hans, Soffíu Guðmundsdóttur, betur þekkt sem Dedda, hafi tekist að skapa hjá félaginu.
„Þau hjónin voru bæði á kafi í þessu. Þetta var svona fjölskylduklúbbur og hópurinn alltaf svolítið þéttur. Það er líka hluti af því og þetta er fyrir þessar stóru breytingar sem verða í fótbolta þar sem menn eru keyptir og flakka á milli liða og svona. Það var miklu minna um það á þessum tíma.“
Frétt Stöðvar 2 frá 2007 um andlát Ásgeirs:
Gamlir liðsfélagar og mótherjar mæta í bíó
Logi segir tíma sinn sem íþróttafréttamaður hafa reynst vel við gerð myndarinnar. Hann hafi sankað að sér efni hjá Ríkisútvarpinu og fundið viðmælendur úr hópi liðsfélaga Ásgeirs, mótherja og úr fjölskyldunni hans.
„Hann hafði mikil áhrif á þá sem hann umgengst og það var mikil eftirsjá eftir honum og þeim báðum. Þannig að við ákváðum að hafa eina sýningu þannig að menn gætu komið saman og horft á þetta í bíó,“ segir Logi.
Ýmislegt á döfinni hjá Loga
Logi segist sjálfur hafa ýmislegt á döfinni á milli þess sem hann starfar fyrir Samtök sjávarútvegsfyrirtækja sem sérfræðingur í samskiptum og miðlum. Hann rifjar meðal annars upp gamla takta úr Gettu betur og Spurningabombunni í ritstjórn skemmtiþáttanna Er þetta frétt? á RÚV sem sýndir eru á föstudagskvöldum.
„Þetta hefur verið rosalega gaman. Ég hef alltaf verið spurninganörd í mér, þetta eru svona ákveðin element sem fara ekkert,“ segir Logi. Hann segir ýmislegt fleira á döfinni en gefur ekki upp nákvæmlega hvað.
„Ég er að vinna í einhverjum heimildarmyndum og svona, gera hitt og þetta bara. Ég er að vinna hjá SFS og svo þess á milli hef ég verið að nýta tímann í allskonar hluti. Ég hef voða gaman af þessu. Það er gaman að skapa og búa eitthvað til, þannig mér fannst þetta frábært verkefni.“
