Felix víkur og ó­vissa með Gísla Martein

Þetta staðfestir Skarphéðinn Guðmundsson dagskrárstjóri RÚV í samtali við Vísi. Eins og flestir vita tilkynnti Baldur Þórhallsson stjórnmálafræðiprófessor og eiginmaður Felix í vikunni um forsetaframboð. Víða má nú sjá auglýsingaskilti með myndum af þeim Baldri og Felix og nöfnum þeirra undir.

Baldur hefur þegar safnað meðmælunum 1500 sem þarf til gjaldgengs forsetaframboðs og stefnir í annasamar vikur hjá hjónunum fram að kosningum 1. júní.

Rúnar Freyr tekur við

„Það er ljóst að um leið og hann tók þessa ákvörðun þá sagði hann sig frá öllum verkefnum sem hann hefur verið að sinna fyrir RÚV, bæði fyrir sjónvarp og útvarp,“ segir Skarphéðinn.

Felix hefur undanfarin ár meðal annars starfað í stýrihópi Eurovision keppninnar og komið að upphitunarþáttunum Alla leið í sjónvarpinu. Skarphéðinn segir ljóst að Felix sé hokinn af reynslu en fleiri séu til staðar til að taka við keflinu. Rúnar Freyr Gíslason sem starfað hefur sem fjölmiðlafulltrúi íslenska hópsins undanfarin ár tekur við sem fararstjóri hópsins.

Hver verður þá fjölmiðlafulltrúi í stað Rúnars?

„Það er ekki frágengið. Það er ekki eins áríðandi og hefur verið allur gangur á því hvernig þeirri stöðu hefur verið háttað undanfarin ár,“ segir Skarphéðinn. Hann segir útfærslur verði teknar fyrir eftir páska.

Einbeitingin á atriðinu

Spurður hvort von sé á frekari breytingum, meðal annars á starfi kynnis á keppninni, sem Gísli Marteinn Baldursson sjónvarpsmaður hefur gegnt undanfarin ár, segir Skarphéðinn að ekki hafi verið tekin ákvörðun um það.

Gísli Marteinn hefur grínast með þátttöku Íslands í Eurovision í föstudagsþáttum sínum og verið opinskár vegna hamfaranna fyrir botni Miðjarðarhafs á samfélagsmiðlinum X. Vísir hefur ekki náð tali af Gísla og er ekki kunnugt um hvort sjónvarpsmaðurinn sækist eftir því að kynna keppnina.

„Þetta er bara eitt af því sem við erum að vinna núna, að manna stöður. Það er enginn sem á neina stöðu og enginn sem gengur að þessu vísu,“ segir Skarphéðinn.

„Við vegum og metum árlega hvernig best sé að manna þetta, við erum í því núna og höfum enn tíma. Venjulega gerum við það ekki fyrr en eftir páska. Núna snýr einbeitingin öll að atriðinu.“

Framlag Íslands í Eurovision í Malmö verður flutt á fyrra undanúrslitakvöldi keppninnar, þriðjudagskvöldið 7. maí. Lokakvöldið fer svo fram laugardagskvöldið 11. maí.