Hættu­legt fyrir Guð­laugu Eddu að keppa á ÓL í París?

Edda verður fyrst Íslendinga til að keppa í þríþraut á leikunum og er jafnframt eina íslenska konan sem hefur, eins og staðan er í dag, tryggt sér þátttökurétt á leikunum. Það vonandi breytist þegar nær dregur leikunum.

Þríþrautarkeppni snýst um sund, hjólreiðar og hlaup. Byrjað er að synda einn og hálfan kílómetra í opnu vatni, þá eru hjólaðir 40 kílómetrar og loks hlaupnir 10 kílómetrar.

Þetta verða sjöundu Ólympíuleikarnir í röð þar sem keppt er í þríþraut en fyrst var keppt á þessari grein á leikunum í Sydney 2000.

Leikarnir settir á ánni Signu

France 24 sjónvarpsstöðin fjallaði hins vegar um miklar áhyggjur tengdum þríþrautarkeppninni í París.

Þetta verða sögulegir Ólympíuleikar fyrir þá staðreynd að setningarhátíðin mun fara fram á ánni Signu sem rennur í gegnum París framhjá Notre Dame-dómkirkjunni, Louvre-safninu og Eiffelturninum.

Keppendur munu þar fara um á bátum og fólk mun safnast fyrir á árbakkanum til að fylgjast með.

Signa kemur líka við sögu í keppni leikanna og þar á meðal í þríþrautarkeppninni. Útisundið á nefnilega að fara fram í Signu.

Hefur verið bannað að synda í Signu

Það er þess vegna sem France 24 fjallaði ítarlega um ástandið á ánni.

Parísarbúar hafa ekki mátt synda í Signu í hundrað ár en miklu hefur verið tjaldað til við það að hreinsa upp ána á síðustu árum. Miklu fjármagni var veitt í þetta metnaðarfulla verkefni en er það mögulegt að hreinsa ána?

Bátseigendur á Signu mega sem dæmi ekki lengur losa neinn úrgang í ána ekki frekar en aðrir Parísarbúar. Áin er hreinsuð áður en hún rennur í gegnum borgina og París hefur gert ráðstafanir til að veita umfram regnvatni rétta leið.

Finnst áin enn vera óhrein

Í frétt France 24 kemur fram að lítið er um svör þegar leitast er eftir upplýsingum um mælingar á sýkla- og veirufjölda í ánni. Fréttakonan segist sjá mörg merki um það að áin sé enn mjög óhrein.

Það hafa líka verið óopinberar mælingar sem sýna fram að að það sé hreinlega ekki gott fyrir heilsu fólks að synda í ánni.

Mótshaldarar halda hins vegar í vonina um að þeim takist að hreinsa ána fyrir leikana. Þeir segja þó að niðurstöður mælinga verði ekki gerðar opinberar fyrr en á keppnisdögum því margt geti breyst þangað til.

Geta fært keppnina milli daga

Það er líka búið að ákveða það að hafa keppnisáætlunina sveigjanlega þannig að mögulega þarf að færa keppnina fram um dag eða daga ef mælingar eru yfir heilsufarsmörkum.

Margir keppendur hafa látið bólusetja sig fyrir ýmsum kvillum til að vera öruggir með að koma ekki illa út úr sundinu í Signu. Guðlaug Edda þarf mögulega að hugsa um það en eftir ferð til Asíu og Afríku má búast við því að hún hafi farið í margar bólusetningar á síðustu mánuðum.

Það má sjá alla umfjöllun France 24 hér fyrir neðan.