Þýskur risi í sam­starf við ACT4 um gerð Stóra Bróður

Þáttaröðin byggir á verðlaunabók Skúla Sigurðssonar. Ólafur Darri Ólafsson, leikari og einn af eigendum ACT4 leiðir handritagerð og þróun þáttanna. Fyrirtækið tryggði sér réttindi að skáldsögunni á síðasta ári. Skúli Sigurðsson vann íslensku glæpsagnaverðlaunin fyrir söguna og var tilnefndur til Glerlykilsins, skandinavísku glæpasagnaverðlaunanna.

„Svona samstarf eru risastórar fréttir fyrir félagið okkar. ZDF Studios er svo stór og virtur aðili, svo þetta gerir okkur kleift að setja markið mjög hátt fyrir þetta verkefni,“ segir Jónas Margeir Ingólfsson, framkvæmdastjóri ACT4.

Saga um hefnd og réttlæti

Stóri Bróðir er saga um hefnd og réttlæti. Á hverju fullu tungli er maður laminn í klessu. Gerandinn virðist sá sami í hvert sinn, svartklædd manneskja sem hverfur út í nóttina líkt og draugur. Fórnarlömbin virðast handahófskennd í fyrstu en svo kemur í ljós að þau eru vandlega valin: kynferðisbrotamenn sem hafa komist undan refsingu.

Blaðamaður tekst á við að leysa þessa dularfullu glæpi. Sagan er einnig sögð frá sjónarhorni árásarmannsins, sem lítur á sig sem fulltrúa réttlætis er útdeilir refsingu til kynferðisbrotamanna sem hafa sloppið við refsingu vegna brotalama í réttarkerfi nútímans.

„Við erum spennt að vinna með ACT4 að aðlögun á frábærlega unninni skáldsögu Skúla Sigurðssonar. Persónurnar, hvernig frásögnin er sögð frá tveimur mismunandi sjónarhornum og hvernig spennan magnast eftir því sem söguþráðurinn þróast gerir þetta að gæsahúðar-hámhorfs senu,“ er haft eftir Yi Qiao, forstöðumanni leikins efnis hjá ZDF Studios.

Ólafur Darri Ólafsson stýrir eins og áður segir handritahöfundarherbergi fyrir þáttaröðina. Í teyminu eru Aníta Briem, Anna Gunndís Guðmundsdóttir og Teitur Magnússon.

„Sem glæpasaga er Stóri Bróðir spennuþrungin og brútal frásögn. En svo rís hún hærra því hún setur fram knýjandi spurningu fyrir okkur að kljást við: Réttarkerfið okkar hefur brugðist fórnarlömbum kynferðisbrota. Ef einhver tekur að sér að refsa kynferðisbrotamönnum á harkalegan hátt án dóms og laga, hvort myndum við standa með honum eða þeim sem reyna að handsama hann?“ spyr Ólafur Darri Ólafsson.