Sturluðust allir úr gleði þegar myndband náðist af Ágústi fara holu í höggi

Stefán Árni Pálsson skrifar 10. júlí 2024 08:32

Lygilegt tilviljun að höggið hafi náðst á myndband.

„Þetta var hreinlega mögnuð tilfinning, ég verð að viðurkenna það. Þetta sló mann alveg og það var lítið sagt í golfbílnum eftir þessa holu, það er smá spennufall sem fylgir þessu,“ segir kylfingurinn Ágúst Freyr Hallsson sem náði því merkilega afreki að fara holu í höggi seint á síðasta ári á 17. holunni á Campoamor á Spáni.

Styrmir Erlendsson vinur hans og meðeigandi Brutta Golf náði afrekinu á filmu og er það aðgengilegt á TikTok.

„Ég hafði verið í smá kennslu hjá hinum eina sanna Birgi Leifi daginn áður og hann var að reyna að sýna mér hvernig líkamsstaðan mín ætti að vera með því að taka mig upp á símann frá þessu sjónarhorni,“ segir Ágúst og heldur áfram.

Ágúst Freyr gleymir aldrei þessari 17. holu.

„Við félagarnir spiluðum 36 holur þennan dag og seinni 18 voru ekki að ganga neitt rosalega vel hjá mér. Ég var orðinn tæpur á golfkúlum og var einmitt að leita af golfkúlunni minni úti skógi þegar ég finn kúluna sem ég nota á næstu holu sem ég fer holu í höggi á.“

Þetta gerist á þessari holu

Þarna segist Ágúst hafa verið orðinn vel pirraður á því hversu illa gekk.

„Ég ákvað að láta Styrmi vin minn taka mig upp frá sama sjónarhorni og Birgir Leifur var búinn að taka mig upp daginn áður til þess að reyna sjá hvers vegna flest högg voru að enda úti í runna. Á meðan við stöndum allir á teig og bíðum eftir að hollið á undan okkur klárar þá spyr Styrmir hvort að einhver af okkur hafi farið holu í höggi eða orðið vitni að því, allir svara neitandi og þá segir Styrmir, það gerist á þessari holu.“

Hér að neðan má sjá þetta ótrúlega atvik og myndband af því.

@akihallss Hole in one caught on camera 🏌️‍♂️⛳️ #golf #golftiktok #holeinone #golftok #foryou #fyrirþig #campoamorgolf #golfer #golfswing #golflife ♬ original sound - Ágúst Freyr Hallsson