Frétti á eftir sam­starfs­fólki að ekki væri óskað eftir vinnu­fram­lagi

Helgi Magnús og fjölskylda hafa sætt þrálátum hótunum af hálfu Mohamad Thor Jóhannessonar, áður Kourani, undanfarin ár. Kourani var á dögunum dæmdur í átta ára fangelsi fyrir tilraun til manndráps og fleiri brot. Helgi sagði á dögunum Kourani ýkt dæmi en verið væri að flytja inn kúltúr í stórum stíl sem væri frábrugðin því sem Íslendingar ættu að venjast.

„Það eina sem stoppar þá er hnefinn, valdbeiting. Ekki er alls staðar sú sama afstaða til laga og réttar og hjá okkur. En við verðum að sætta okkur við það,“ sagði Helgi Magnús. Þau ummæli eru meðal þeirra sem stjórn Solaris, hjálparsamtaka fyrir hælisleitendur og flóttafólk á Íslandi, hefur kært Helga Magnús fyrir.

Helgi Magnús er í sumarfríi eins og margir Íslendingar. Honum barst tölvupóstur frá Sigríði Friðjónsdóttur ríkissaksóknara og yfirmanni sínum um tíu mínútur fyrir tólf í dag þar sem hann var upplýstur um að Sigríður hefði óskað eftir því við Guðrúnu Hafsteinsdóttur dómsmálaráðherra að Helgi yrði leystur frá störfum tímabundið vegna málsins. Sigríður sendi starfsmönnum ríkissaksóknara tölvupóst nokkrum mínútum síðar til að upplýsa þá um stöðuna. 

Helgi sá póstinn frá Sigríði ekki fyrr en klukkustund eftir að hann var sendur og því við búið að einhverjir samstarfsmenn hafi fengið fregnirnar á undan Helga.

„Ég hef þar af leiðandi verið upplýstur um þetta um klukkustund eftir að samstarfsfólk mitt var meðvitað um þetta. Það er ekki einungis rangt heldur einnig brot á trúnaðarskyldu Sigríðar Friðjónsdóttur gagnvart mér sem undirmanni sínum,“ segir Helgi Magnús.

Tekur ábyrgð á orðum sínum

Sigríður var skipuð ríkissaksóknari vorið 2011 og Helgi Magnús vararíkissaksóknari sama haust. Því hafa því verið samstarfsmenn hjá embættinu og æðstu koppar í búri undanfarin þrettán ár. Hann er allt annað en sáttur við viðbrögð yfirmanns síns.

„Við erum öll mannleg. Sem betur fer vil ég meina og greinilega í ljósi þessarar stöðu sem ég er kominn í - þá líka því miður. Ég get og hef í gegnum tíðina tekið ýmislegt á kassann, en eftir að hafa til fjölda ára þurft að sitja undir hótunum sem snúa meðal annars að lífi barna minna og ekki fengið neinn stuðning frá embætti Ríkissaksóknara í þeim efnum, tjáði ég mig opinberlega,“ segir Helgi Magnús.

„Hefði ég mátt sleppa því? Já? Er það tilefni til þess að ég verði leystur undan störfum? Nei. Frekar tel ég tilefni til að Ríkissaksóknari líti sér nær og hugsi leiðir til að veita starfsfólki embættisins stuðning í stöðum sem þessum. Ég tek ábyrgð á orðum mínum en ég er fullfær um að valda starfi mínu. Það er spurning hvort yfirmaður minn sé fær um hið sama.“