Niður­brotin Marta gekk grátandi af velli

Hin 38 ára gamla Marta , sem er marka­hæsti leik­maður brasilíska lands­liðsins frá upp­hafi, hefur áður gefið það út að þetta sé hennar síðasta ár með brasilíska lands­liðinu. Hún er nú á sínum sjö­ttu Ólympíu­leikum.

Í upp­bóta­tíma venju­legs leik­tíma í fyrri hálf­leik í leik Brasilíu gegn Spáni í C-riðli tók Marta glóru­lausa á­kvörðun þar sem að hún fór allt of hátt með vinstri fót sinn í ná­vígi við Olgu Car­monu, leik­mann spænska lands­liðsins.

Fótur Mörtu snerti höfuð Car­monu og var erfitt fyrir dómara leiksins að gera annað en að draga upp rauða spjaldið og reka Mörtu af velli.

Marta varð gjör­sam­lega miður sín og gekk grátandi af velli inn til búnings­her­bergja í leik sem gæti hafa verið hennar síðasti fyrir brasilíska lands­liðið á stór­móti, jafn­vel síðasti leikurinn hennar yfir höfuð fyrir Brasilíu.

Staðan var marka­laus þegar að Marta var rekin af velli en ríkjandi heims­meistarar Spánar settu tvö mörk í seinni hálf­leik og fóru með 2-0 sigur af hólmi.

Brasilía endaði í 3.sæti C-riðils en eftir sigur Banda­ríkjanna gegn Ástralíu seinna sama dag varð ljóst að Brasilía kæmist á­fram í átta liða úr­slit Ólympíu­leikanna sem eitt tveggja liða í þriðja sæti riðlanna með besta árangurinn.

Brasilía mun mæta heima­konum í franska lands­liðinu í átta liða úr­slitum Ólympíu­leikanna. Marta verður í banni í þeim leik og að­eins af Brasilíu tekst að vinna Frakk­land mun hún snúa aftur til leiks á leikunum í undan­úr­slitum.