Upp­lifunin verði eins og að fara í búð í út­löndum

Prís verður til húsa á Smáratorgi en Gréta María Grétarsdóttir, framkvæmdastjóri segir markmiðið að ná að opna um miðjan ágúst, í það minnsta í ágústmánuði. Hún segir markmiðið að bæta hag heimila með því að lækka matvöruverð á Íslandi.

Munu Íslendingar finna alvöru verðmun sem hefur þýðingu?

„Já, en það eru ýmsar áskoranir sem fylgja því að koma inn á markað þar sem engin breyting hefur orðið í yfir 20 ár. Meðal annars eru innkaupsverðin til okkar – og ég hef áður sagt það – við fáum stundum verð sem gera okkur mjög erfitt fyrir að bjóða vörur á samkeppnishæfu verði og þá reynum við að finna sambærilegar vörur erlendis frá og flytja þær inn. Á sama tíma erum við að sjálfsögðu að horfa í allt í okkar rekstri, og á það sem við getum gert til að draga úr kostnaði til að geta boðið viðskiptavinum lægra verð. Það gerum við til dæmis með því að hafa minni yfirbyggingu, útskýrir Gréta María.“

Dæmi um minni yfirbyggingu hjá Prís er styttri opnunartími. Þá verða í versluninni eingöngu sjálfsafgreiðslukassar og ekki verður tekið við reiðufé.

Rangt gefið á markaðnum

Hún segir að stóru keðjurnar, sem fyrir eru á fleti, bjóðist mun lægra innkaupaverð.

„Það er náttúrulega mjög óeðlilegt þegar verðmunur frá byrgjum til verslana eins og okkar er orðinn það mikill að það borgi sig fyrir okkur að versla vöruna af samkeppnisaðila. Það er eitthvað rangt gefið á þannig markaði.“

Þetta hefur orðið til þess að Gréta, og félagar hennar, hafa sjálf ráðist í umfangsmikinn innflutning á nýjum vörum sem Íslendingar þekkja kannski minna, eða jafnvel ekkert. Einnig verður í það minnsta hluti þeirra vara sem Íslendingar þekkja vel ekki hluti af úrvalinu í Prís.

„Þá er bara einfaldlega ástæðan sú að við getum ekki boðið hana á samkeppnishæfu verði og ef við ætlum að vera ódýrust á markaði þá verðum við að tryggja það að halda það loforð við okkar viðskiptavini og þá getum við ekki boðið þeim vörur sem við erum ekki að fá á samkeppnishæfu verði.“

Stofnendur Bónus og Krónunnar á bak við Prís

Íslendingar muni þannig fá að kynnast alls konar glænýjum vörum.

„Ég hugsa að þetta verði eins og að fara í búð í útlöndum því það verður margt nýtt og skemmtilegt hjá okkur,“ segir Gréta María full tilhlökkunar.

Verslunin Prís er vörumerki undir hatti Heimkaupa sem er í eigu félaganna Skel og Norvik. Stjórnarformaður Skeljar er Jón Ásgeir Jóhannesson og stjórnarformaður Norvik er Jón Helgi Guðmundsson, gjarnan kenndur við Byko. Jón Ásgeir kom að stofnun Bónus árið 1989 ásamt föður sínum Jóhannesi Jónssyni.