Mundi ekki neitt en fékk samt að spila á­fram

Mikil vitundarvakning hefur verið undanfarin ár um alvarleika höfuðhögga og þá sérstaklega að fá annað höfuðhögg þegar þú hefur fengið heilahristing áður í sama leik. Svíar þurfa greinilega að passa betur upp á sín mál ef marka má atvik gærkvöldsins.

Hampus Skoglund, leikmaður Hammarby, fékk höfuðhögg í leik á móti Gais. Sænskir fjölmiðlar, þar á meðal Aftonbladet, setja spurningarmerki við þá ákvörðun að leyfa honum að halda áfram inn á vellinum.

Skoglund lenti í samstuði og skall í jörðina. Hann þurfti aðhlynningu í langan tíma en fékk samt grænt ljós frá sjúkraþjálfara liðsins.

Þegar liðin gengu til hálfleiks þá greip sjónvarpsmaður Discovery leikmanninn í viðtal. Sjónvarpsmaðurinn spurði hann út í fyrri hálfleikinn en Skoglund mundi hreinlega ekki neitt.

„Sko ef ég á að vera hreinskilinn þá man ég ekki neitt. Við áttum ágætan fyrri hálfleik, held ég. Ég man það ekki,“ sagði Skoglund.

Eftir leikinn fékk það síðan staðfest að Skoglund hafði fengið heilahristing. Hann mun vonandi sleppa betur en sumir sem hafa tekið áhættuna á því að spila áfram eftir slæmt höfuðhögg. Margir þeirra hafa þurft að leggja skóna hreinlega á hilluna og þá eru ekki upptalin vandmál þeirra í hinu daglega lífi.