Perla keppti með þeim bestu í Solheim-bikar ung­menna

Á mótinu keppa bestu 12-18 ára kvenkylfingar Evrópu og Bandaríkjanna, líkt og í Solheim-bikarnum sjálfum sem nú er að hefjast í Virginíu-fylki, en Perlu og stöllum hennar er boðið að fylgjast með því móti.

Evrópuliðið safnaði aðeins 5,5 stigum í Solheim-bikar ungmenna í ár, gegn 18,5 stigum Bandaríkjanna, og hefur munurinn aldrei verið meiri. Evrópa hafði þó unnið tvö síðustu mót.

Perla byrjaði á að spila fjórbolta með Havanna Thorstensson frá Svíþjóð, og töpuðu þær 4/2 gegn Sofia Cherif Essakali og Mia Hammond.

Í fjórleiknum lék Perla hins vegar með Louis Uma Landgraf, gegn Hammond og Avery McCrery, og gerðu þær jafnefli og fengu hálft stig. Þær náðu mest tveggja holu forskoti.

Evrópa tapaði fjórum leikjum í fjórleiknum og vann einn, eftir að hafa fengið tvo og hálfan vinning í fjórboltanum gegn þremur og hálfum vinningi Bandaríkjanna.

Í gær var svo leikinn tvímenningur þar sem Bandaríkin unnu 10 af 12 leikjum, einn fór jafntefli og Evrópa vann einn.

Perla mætti Jude Lee og varð að sætta sig við 5/4 tap, eftir að Lee náði fimm holu forskoti á fyrstu sjö holunum. Perla vann eina holu, þá þrettándu, en Lee tryggði sér svo sigur í leiknum á næstu holu.

Það breytir því ekki að Perla, sem verður 18 ára síðar í þessum mánuði, hlaut þann heiður að vera valin í hóp tólf kylfinga Evrópuúrvalsins, af fyrirliðanum Gwladys Nocera. Hún er næstyngsti sigurvegari í sögu Íslandsmótsins í golfi eftir að hafa unnið titilinn í Vestmannaeyjum árið 2022 og varð Evrópumeistari 16 ára og yngri sama ár. Þá varð hún Íslandsmeistari í holukeppni í fyrra, auk fjölda titla sem unglingur.